«Иацы аусԥҟақәа ҩба снапы рыҵазҩит – иара ихатәгәаԥхарала Аԥыза-министр актәи ихаҭыԥуаҩыс иҟаз Беслан Џьопуа ихы иақәиҭтәразы. Ҭабуп ҳәа шәасҳәарц сҭахуп ақыҭанхамҩа аминистрк иаҳасабала ҳкомандаҿы шәахьаанхаз азы. Иацы снапы аҵазҩит Аԥыза-министр актәи ихаҭыԥуаҩыс Џьансыхә Нанба иҟаҵаразы. Ари ауаҩ шәара ибзианы дышәдыруеит. Сгәыӷуеит абарҭ акадртә еиҭакрақәа Аиҳабыраҿы аусура иацхраап ҳәа, убри инаваргыланы ҳара ҳҿаԥхьа иқәгылоу ауснагӡатәқәа рҭыԥ рықәҵарагьы», – иҳәеит Бжьаниа.

Беслан Џьопуа Џьансыхә Нанба ақәҿиарақәеи лҵшәабзиала аусуреи изеиӷьаишьеит.

Иара иганахьала, Џьансыхә Нанба атәыла анапхгара ҭабуп ҳәа реиҳәеит изыҟарҵаз агәрагаразы.

«Сара зегь рыла сҽазысшәоит Аԥыза-министр Алеқсандр Анқәаб инапхгарала Аминистрцәа Реилазаара аусура иҵегьы алҵшәа аиурц азы. Уи иадысҵоит сымч, сдырра, сылшарақәа», – иҳәеит иара.