Гәында Кәыҵниа лажәақәа рыла,  мышқәак раԥхьа иааргеит 3 шықәса инаркны  10 шықәса рҟынӡа зхыҵуа рзы, зтираж 3000  рҟынӡа иҟоу иҿыцу ԥшь-ҭыжьымҭак. Асериа «Сара раԥхьатәи сышәҟәы» аҟынтәи асахьақәа рыла ишьақәгылоу ажәар, ахәыҷқәа рзы алакә-апиеса «Ажьа агәымшәа», ԥшшәы хкыла ашәыгақәа зцу ажәеинраалақәа реизга «Ашәҭқәа рашәа», насгьы ажәеинраалақәа реизга «Ааамҭеи асааҭи». Иара убас иааргеит 3500 екземплиар рҟынӡа инаӡо аԥсуа бызшәазы алабҿабатә цхыраагӡатәқәа. 

 Гәында Кәыҵниа излалҳәаз ала, ашәҟәқәа реиҳарак Аԥсны араионқәа зегьы рышколқәеи рхәыҷбаҳчақәеи ирызшахоит. Аԥсуа бызшәа аекспертцәа, аметодистцәа, ааԥхьара зауз асахьаҭыхыҩцәа Аҳәынҭусбарҭа аспециалистцәа рнапхгарала фымз инарзынаԥшуа  ашәҟәқәа аус рыдырулон.

Аԥсуа бызшәахь здублиаж ҟаҵоу амультфильмқәа 11 ҳазҭоу ашықәс нҵәаанӡа ахәаԥшыҩцәа идырбахоит. Абызшәатә политиказы аҳәынҭқарратә Усбарҭа аҿы   аҭыжьразы еиқәдыршәоит аԥсышәала иҭыжьхо «Аусеилыргара азы анапхгараҭара». Аиԥылараҿы аԥсуа бызшәа ашҟа еиҭагоу ахәыҷтәы сахьаркыратә литература, иоригиналу аԥсуа литература, аҭыжьра аганахьала 2024 шықәсазы Аҳәынҭусбарҭа  аусмҩаԥгатәқәа рплан анагӡара алыршара иалацәажәеит.