Ааигәа Маиҟәаҧ иаҭааит агазеҭ «Аҧсны» аредактор хада Ахра Анқәаби  Аҧснытәи аҳәынҭуниверситет В.Анқәаб ихьӡ зху Аҧсуа-адыга филологиа ацентр алаборант еиҳабы Асмаҭ Беиаҧҳаи. Урҭ аиҧылара рзеиҿкаан агазеҭ «Адыге Моҟәи» аредакциаҿы.

Агәанагарақәа  реибыҳәараан аредакциақәа рнапхгаҩцәа рылацәажәеит аусеицура амҩақәа. Аҧсышәалеи адыга бызшәалеи наҟ-ааҟ аматериалқәа реимдареи рҭыжьреи ирзааҭгылеит.

–Ҳәарада, аусеицура аҭахуп. Иахьазы  иаауҭаху аинформациа аинтернет ала иуоуазаргьы, ухы иаурхәозаргьы, акьыҧхь актуалра  шалоу иаанхоит. Агазеҭқәе ирнылоит адунеи аҟны имҩаҧысуа ахҭысқәа: аполитикеи, ауаажәларреи, акультуреи, аспорти уҳәа ирызкны. Аха, зда ҧсыхәа ыҟам акәны иҟоуп ҳмилаҭтә бызшәақәа рыла аҭыжьра аус арҿиара, – иҳәеит Ахра Анқәаб аимадарақәа дырзааҭгылауа.

Ареспубликатә газеҭ «Адыге Маҟә» аредактор хада Саида Мешлок лакәзар, иазгәалҭеит рҭыжьымҭа амаҵ азызуа гәацҧыҳәарала рколлегацәа аус рыцура ишазхиоу.

– Ҳара даара ҳаигәырҕьоит «Адыга Маҟә» аус ацура аҭагылазаашьа ахьҳауз. Ҳжурналистцәа рҧышәа аимдара аидеиа ҳадгылоит, уи ҳазхиазаауеит, – иҳәеит Ахра Анқәаб.

Маиҟәаҧ иаҭааз адыга газеҭ аредакциа аусура шеиҿкаау ддырбеит, иҟан Амилаҭтә музеи аҟнгьы.