Ргәалашәарақәа рыла иқәгылеит Аҧыза-министр актәи ихаҭыҧуаҩ Беслан Џьопуа, ауаажәларратә усзуҩцәа Виачеслав Цыгәба, Нугзар Ашәба, Аҧсны Акомпартиа Аполитхеилак иалоу Лев Шамба, Урыстәыла ашәҟәыҩҩцәа Реидгыла маӡаныҟәгаҩ Олег Етлухов уҳәа егьырҭгьы.
Валериан Кобахиа иҧа Беслан Кобахиа иҳәеит: «Иҭабуп аамҭа ҧшааны абрахь шәахьааиз. Саб иҧсҭазаара далҵит 30 шықәса уажәаҧхьа, ихыҵуаз 63 шықәса заҵәык ракәын. Иҭабуп ҳәа расҳәоит ҳаиҳабыра, Аҟәа ахадара аиҳабы. Саб ибаҟа бзиахеит. Абзиарақәа зегьы ишәзеиҕьасшьоит».
Абаҟа авторс дамоуп аскульптор Григори Потоцки.
2021 шықәса март 17 азы Аҟәатәи ақалақьтә Еизара аилатәараҿы ақәҵара рыдыркылеит ҧасатәи Аминистрцәа Рсовет ахыбра азааигәара, Аидгылара амҩаҿы абаҳчеибаркыра Валериан Кобахиа ихьӡ ахҵаразы.
