Агазеҭ лассы-лассы рҩы­мҭақәа анырҵон: Д. Гәлиеи С. Ҷанбеи, Д. Аланиеи, М. Лакрбеи реиԥш, М. Аҳашба, Ӡ. Дарсалиа, И. Аџьынџьал, О. Чачаа, Б. Ҷолокәуа, М. Булиа, М. Чалмаз, И. Коӷониа, М. Қәычбериа, Ш. Хокерба, Е. Ачба, П. Шьаҟрыл, Н. Маан уҳәа егьырҭгьы.
Ҩышықәса иҭыҵуаз агазеҭ, Аԥсны Асовет мчра анышьақәгыла нахыс 1921 ш. март 4 инаркны ахьӡ ԥсахын, «Аԥсны ҟаԥшь» ҳәа аҭыҵра иалагеит.

Аханатә еиԥш, ари аҭы­жьымҭа аамҭа ҿыц аҭахрақәа ирықәшәон, аԥса жәлар рмилаҭ-хақәиҭратә қәԥара, иара убас акультуреи аҵареи русхк аҟны аиҭакрақәа ҳажәлар рхатәы бызшәала ирызнанагон. «Аԥсны ҟаԥшь» раԥхьатәи аамҭазы агазеҭ «Голос трудовоҟ Абхазии» агәлаҵак аҳасабала иҭыҵуан. Уи аҭыжьра рнапы ианын аҭакзыԥхықәу аредактор Самсон Ҷанбеи ашәҟәыҩҩы ҿа Миха Лакрбеи. Аха ҷыдала аҭыжьра знапы алакыз, аредактор ҳәа иаҵазыҩуазгьы М. Аиба ҳәа ианызҵоз ашәҟәыҩҩы Миха Лакрба иакәын.
«Аԥсны ҟаԥшь, ианылон еиуеиԥшым атемақәа ирызкны, алитературеи, акультуреи, аҟазареи, аҵареи аԥхьа инаргыланы.

Еиуеиԥшым ашықәсқәа раан агазеҭ редакторцәас иаман: Нестор Ҭаркьыл, Мушьни Аҳашба, Нестор Абжарба, Рушьни Гадлиа, Николаи Басиаҭ Киут, Руфеҭ Быҭәба, Сергеи Кәыҵниа, Борис Ҭыжәба, Владимир Қапба, Енвер Ажьиба, иахьа аредакторс дамоуп Ахра Анқәаб.
Агазеҭ шьарда алнаршеит алитературатә бызшәа ашьақәгылараҿы, амилаҭтә апублицистика арҿиараҿы. Абар, уи раԥхьатәи аномер анҭыҵыз аахыс 105 шықәса ҵит. Амилаҭтә журналистка арҿиара аус аҟны агазеҭ алагала дууп.
Ԥыхьатәи Асовет Еидгыла анхыбгала агазеҭ уаанӡатәи ахьӡ азырхынҳәын. Иахьа уажә­раанӡагьы «Аԥсны» ахьӡ иадҳәалоу аҭоурых мырӡӡакәа, атрадициа иацҵо иааргоит уи амаҵ азызуа аусзуҩцәа. Абжьааԥнеиԥш, ҳажәлар ргәеисра иацуп. Акультуреи, аҟазареи, аҵареи, асоциалтә зҵаатәқәеи реиԥш, ианылоит ауаажәларра-политикатә ԥсҭазаареи, аԥҵаарадырреи, алитературеи аспорти уҳәа ирызкны.