Руфбеи Ебжьноу диит 1946 ш. март 13 рзы Гәдоуҭа араион Џьырхәа ақыҭан. СССР-и Аҧсни рышәҟәыҩҩцәа Реидгылақәеи Урыстәыла ашәҟәыҩҩцәа Реидгылеи рлахәыла (1999). Ианашьоуп «Ахьӡ-Аҧша» аорден ахҧатәи аҩаӡара (2016).
1973 ш. А. М. Горки ихьӡ зху Москватәи Алитератруратә институт далгеит. Убри ашықәс инаркны С. И. Ҷанба ихьӡ зху Аҧсуа ҳәынҭқарратә драматә театр алитературатә хәҭа деиҳабын. 1975 ш. нахыс Аҧсны ашәҟәыҩҩцәа Реидгыла алитературатә консультантс дыҟан, аамҭакала алекциақәа дрыҧхьон А. М. Горки ихьӡ зхыз Аҟәатәи аҳәынҭқарратә арҵаҩратә институт аҟны. Аамҭақәак рзы ажурнал «Алашара» алитературатә критика аҟәша деиҳабын, Аҧсны ашәҟәыҩҩцәа Реидгыла асахьаркыратә литература аларҵәара абиуро адиректорс дыҟан. Аԥсуа жәлар рмилаҭ-хақәиҭратә қәҧара далахәын. Аҧсны жәлар рфорум «Аидгылара» аҧҵара аҧшьгаҩцәа дреиуан.

Аҧсуа поезиа, иара убас Н. Ҳашыг, Р. Смыр уҳәа рырҿиамҭқәа ирзикыз истатиақәа рнылон: ажурнал «Алашара», агазеҭ «Аҧсны ҟаҧшь», аизгақәа, урҭ иреиуоуп: «Ажәақәа ажәаны мацара иаанымхарц» («Алашара». 1977, №9), «Агәаҟреи аҭакҧхықәреи» («Алашара». 1984, №10), «Аҧышәара амҩала» («Алашара». 1985, №12), «Агәы аҟнытә иаауа ашәа» («Алашара. 1986. №9) уҳәа егьырҭгьы.
1979 ш. Аҟәа аҧсышәала иҭыжьын илитература-критикатә статиақәа реизга «Иҭынчым аҭынчра». Уи иагәылалеит Б. Шьынқәба, А. Џьонуа, А. Аџьынџьал, Н. Ҳашыг, Н. Ҭарба, М. Миқаиа, Т. Аџьба, Н. Кәыҵниа, А. Возба рырҿиаҭақәа ирызкны.
Алитератураҭҵаара инаваргыланы дырдыруеит еиҭагаҩны. Аҧсшәахь еиҭеигеит аурыс, абаза, ақырҭуа бызшәақәа рҟнытә арҿиамҭақәа жәпакы. (Б. Ҭҳаиҵыкә иажәабжь кьаҿқәа, К. Џьгәаҭан ироман «Маридаҭ» ацыҧҵәаха уҳәа). 1988 ш. иҭыҵит иеиҭагамҭақәа реизга «Ахаҿқәа». Ашәҟәы иагәылалеит апиесақәа: Ж. Шехаде – «Брисбентәи аемигрант», Ҭ. Ҷилаӡе – «Актриса ҿа лзы ароль», Е. Раннет – «Ацәгьауратә танго» уҳәа егьырҭгьы.
Руфбеи Ебжьноу иԥсҭазаара далҵит 2016 ш. август 13 рзы Аҟәа.