Миха Алеқсандр (Аҳмаҭ)-иҧа Лакрба диит (19.01.1901) Аҧсны, Аҟәатәи аокруг Кәыдрытәи аучастка (иахьа – Гәылрыҧшь араион) Мархьаул ақыҭан. Аҧсны аҟазара зҽаҧсазтәыз аусзуҩы ҳәа ахьӡ ихҵан. СССР ашәҟәыҩҩцәа Реидгылеи (1938) Аҧсны ашәҟәыҩҩцәа Реидгылеи дрылан. Аџьынџьтәылатә еибашьра Дуӡӡа (1941-1945) далахәын. Асахьаркыратә ҩымҭақәа иҩуан аҧсышәала, астатиақәеи аҭҵаамҭақәеи – урысшәалеи аҧсышәалеи.

Аҵара иҵон Мархьаултәи ауахәаматә школи (1908-1911), Аҟәатәи ашьхарыуаа ршколи (1909 - 1912), Аҟәатәи ареалтә ҵараиурҭеи (1913-1918) рҟны. Қарҭтәи аполитехникатә институт аекономика-иуристтә факультет далгеит (1929), иара убас Москва, асценаристцәеи акинорежиссиорцәеи Иреиҳау ркусрқәа (1937). 1921-1925 шш. раан агазеҭ «Аҧсны ҟаҧшь» аредакторс аус иуан. 1931-1936 шш. рзы акәзар, акиноекспедициа «Восток-кино» даланы дыҟан  Даӷьсҭан, Одесса, Сибра, Урал. Акинофабрика «Восток-кино» ашҟа аусура дрыдыркылеит М. А. Шолохов иҟаиҵаз абжьагарала.

1934 ш. СССР ашәҟәыҩҩцәа актәи реизара ду далахәын.

М. Лакрба ирҿиаратә усура ахацыркра апублицистикеи апоезиеи ирыдҳәалоуп, аҧхьаҩцәа рахь раҧхьатәи ишьаҿақәа ҟаиҵеит раҧхьатәи аҧсуа газеҭ «Аҧсны» ала.

М. Лакрба раҧхьатәи ишәҟәы «Апиесақәеи астатиақәеи» ҭыжьын Аҟәа 1956 шықәсазы. Авторс дрымоуп апиесақәеи аскетчқәеи реиԥш, ажәеинраалақәа, ановеллақәа, алибреттоқәа, аопереттақәа, афильмқәа. Урҭ аԥсышәала еиԥш, урысшәалагьы хахы шәҟәқәаны иҭыжьын. Урысшәала акьыԥхь абеит иара убас ишәҟәы «Аԥсуа театр аҭоурых аочеркқәа».

Адунеи аҟны деицырдырит иновеллақәа рыла, 25 инареиҳаны абызшәақәа рахь еиҭагоуп, иаагозар: англыз, афранцыз, анемец, аполиак, аиспан, араб, акореи бызшәақәа, зныкымкәагьы Аҟәеи Москвеи иҭыжьын.

М. Лакрба иԥсҭазаара далҵит – 15.10.1965 ш. октиабр 15 рзы. Анышә дамадоуп Аҟәа, ашәҟәыҩҩцәеи ауаажәларратә усзуҩцәеи рпантеон аҟны.