Аамҭа ашьаҿа оумашәа ирласны иеихнагоит, еимгеимцарак иалагӡаны,иагьсызгәамҭеит ашкол алгара шааигәахаз, азанааҭ алхра напы шарктәыз. Еиуеиԥшым ахырхарҭақәа зегьы еиҿырԥшны, урҭ рхықәкы хадақәа срызхьаԥшны, ажәбатәи акласс аҿы сантәаз хшыҩзышьҭра асҭеит, иагьалысхит ажурналист изанааҭ.
Ажурналистика – ари ауаа ргәы иҵхо азҵаарақәа, рцәаныррақәа, рхәыцрақәа реилкаара, рхархәарала акрызҵазкуа аинформациа аӡырҩцәа рҟынӡа анагара алшара ауп. Ауаажәлар рзы ахәарҭа аагареи урҭ рыԥсҭазаара аиӷьтәреи сара схықәкы хадақәа ируакуп, сзанааҭ ахь исыхо амч ргәылакуп.
Ажурналисттә ԥсҭазаара зныԥшуа, ааигәа сзыԥхьоз апрофессор Екатерина Гьаргь-иԥҳа Бебиа лышәҟәы «Ажурналистә ҟазара» аҟнытә зегь реиҳа сгәаҿы иаанхаз цәаҳәақәоуп: «Ажурналистика – маӡа-аргама ауаатәыҩса рыгәқәа рахь уназго мҩахәасҭоуп», –ҳәа зҳәоз. Сгәанала ари ахшыҩҵак ажурналист изанааҭ аҵакы хада аныԥшуеит, уи ибаҩхатәра шынеибаку иамҽханакуеит.
Хаҭала сара адырраҭара «Аспорт Адунеи» авторцәа Асидеи Адицеи Саӷариаа реиԥш имҩаԥызгаларц сҭахуп. Схаҭа аспорт салам, аха аспорт хәмаррақәа шымҩаԥысуа даараӡа исгәаԥхоит, агәеизҳарагьы сырҭоит. Иара убас, аԥсуа журналистцәа инарҷыданы, аурыс журналистцәагьы рзанааҭ азнеишьа сазҿлымҳауп. Урҭ рахьтә далыскаауеит Мариа Команднаиа. Лара аус луан «НТВ-Плиус Футбол», «Матч ТВ» уҳәа аспорттә канал дуқәа рҿы. Лзанааҭдырреи, лыхшыҩҵарреи ауаҩы ахә ҳаракны имшьар залшом, ииашаны лызҵаарақәа реишьҭагылашьеи урҭ рыҭишьеи рыла еицырдыруа спорттә журналиступ. Сара хықәкы хадас исымоуп ззанааҭ бзиа ибаны, гәыцқьала зус иазнеиуа ажурналистцәа сырҿыԥшны схатәы журналисттә мҩа аԥҵара, ииашоу ажурналист иҟазшьа ҷыдақәа азҿлымҳара рыҭаны рхархәара алыршара.
Ҳаԥхьаҟагьы агәра ганы сыҟоуп иалысхыз азанааҭ гәыблыла сшазнеило, сус ҭакԥхықәра ҳаракыла ишынасыгӡало. Уажәазы иалысхыз азанааҭ абзиабара сгәаҿы кәицҵас еибаркны сшьаҿа еихызгарц сҭахуп адыррақәа жәпакы ахьысзыԥшу Аԥснытәи аҳәынҭқарратә университет ахь.
Николь Асланӡиа,
Д.И. Гәлиа ихьӡ зху,
Аҟәатәи абжьаратә школ № 4
а-11-тәи акласс аҵаҩы