Уи абас аԥшӡареи ахаареи аԥшәымара ахьыруа акәны иҟаларцаз сара сыԥсҭазаара мҩақәызҵо, ари адунеи ссир ахь цҳаны исзыҟало акәны сахәаԥшуеит ажурналистика. «Ауаатәыҩса ргәаҵахь уназго мҩахәасҭоуп ажурналистика», - ҳәа лыҩуеит апрофессор Екатерина Гьаргь-иԥҳа Бебиа. Сара уи ахшыҩҵак иацысҵоит: «Ауаатәыҩса ргәы зырҟәандо, рыԥсҭазаара ԥштәы рацәала иузырбо ауп ажурналистика», - ҳәа.
Иҵабыргны, ажурналист илшоит иажәа, ма ивидеоанҵамҭа, ала ауаҩы игәы ахәра иану арӷьара, аԥсҭазаара ганрацәала аарԥшра, дыззымхәыцуа ихшыҩ азишьҭыртә анагара, абзиара иадԥхьалара. Ажурналист ажәлар рҿахәы зҳәо иоуп. Уи ианакәзаалак ажәлар рыгәҭа дыҟазаауеит, ижәлар зҭагылоу аамҭа дафырхаҵоуп, ижәлар ргәеисра инапы ақәкуп.
Сара ажурналистика азанааҭ алакә еиԥшны избоит, избанзар уи иабзоураны аинтерес ду зҵоу ауаа удыруеит, ирызкны ажәа аҳәара уҽазукуеит, ажәакала, ауаҩ нага идунеи ушьапы ҭаургылоит, уи иԥсҭазаара иҵегь аԥсы ахаҵаны аҭоурых иазынужьуеит. Ари азанааҭ алысхит, избанзар, уи знапы алаку ауаа рдунеи акырӡа иҭәы-иԥха ишыҟоу лабҿаба избарҭоуп. Сыбла наҟәымгаӡакәа сызхәаԥшуа дырраҭароуп «Шьажьыбзиа, Аԥснытәыла!». Амҩаԥгаҩцәа зегьы сгәаԥхоит, аха еиҳа далкаан сизыӡырҩуеит актиор Ахра Кәарҷиа. Сара даара сыхнахуеит уи аԥсуа сценаҿ инаигӡо арольқәагьы. Ипрофиссионалтә знеишьа ҳаракуп, иажәа ҳәа ҭбаауп, иаԥсшәа цқьоуп, џьара деиласуа убаӡом. Иара убас, сызҿыԥшуа журналиступ Алхас Ԥсардиа. Акырӡа аинтерес рыҵоуп уи иҭиуа азҵаарақәа. Насгьы исгәаԥхоит ауаа ҳаҭырла дышрызнеиуа, ражәа ԥымҟакәа дшырзыӡырҩуа, иара ихаҭа ицәажәашьа, иҳәоуқәа рышьақәыргылашьа.
Сара снаԥхьан адырраҭара «Шьыжьыбзиа, Аԥсынтәыла!» ахь. Даара сыхнахит ажурналист Кама Адлеиԥҳа сышлыдылкылаз, исгәаԥхеит смаршәа кны исылҭоз азҵаарақәа. Сара сҭакқәа кьаҿын, аха аефир ашьҭахь сазхәыцуан иҭбааны аҭак ҟасҵарц шсылшоз. Даҽа знык снарыԥхьар, хымԥада акырӡа еиӷьны аҭакқәа шыҟасҵо агәра згоит. Сара еилыскаауеит ажурналистика аҟны ахы агәрагара акырӡа шаҵанакуа, уи азы иаҭахуп иҭбаау, иҵаулоу адырра. Адыррақәа риура амҩа санызаауеит. Иара убас сара сазҿлымҳауп аԥсуа милаҭтә газеҭ «Аԥсны». Уи адаҟьақәа инарҳәы-аарҳәуа санрыԥхьо иҟәандаӡа цәаныррақәак сеимырдоит, избанзар, сгәы иахәоит ахьхьаҳәа аԥсышәала иахьҳацәажәо. Агазеҭ саԥхьоит апублицистикатә ажәа гәныскыларц, аԥсуа журналист иҩышьа аласҵарц, гхада сҩырц, аҳәоуқәа рышьақәыргылашьа сҵарц, иаҳараку, исахьарку аԥсуа ажәақәа рхархәашьа сақәшәарц.
Сара сзы инасыԥ духон раԥхьатәи сҩымҭа хәыҷы агазеҭ «Аԥсны» адаҟьақәа рҟны избар. Усҟан ари агазеҭ аномер хәы змам акы акәны иԥхьаӡаны сышкол аҟны идсырбон, сҭаацәа асырԥхьон, нас инҭаршәны исҵәахуан.
Сгәы сыхоит ауаажәларра рыгәҭыха, рхьаа, реихьӡарақәа амасса информациатә хархәагақәа рахь иназгаларц, иҟало ажәабжь ҿыцқәа гәырӷьаҿҳәашак аҳасабала сыжәлар ирыласырҵәаларц. Абарҭқәа зегьы рзы сара иалысхит ажурналистика азанааҭ.
Шьарида Ԥсардиа,
Ԥшьаԥтәи абжьаратә школ
а-11-тәи акласс аҵаҩы