Аминистр лаара ҭабуп ахҳәаауа иазгәеиҭеит, Аԥсны атуристтә хырхарҭа адагьы, аграртә хырхарҭа ишадҳәало. Бадра Гәынба иҳәеит аҭыԥантәи аалыҵ ахаҭабзиара шыҳараку, агәабзиара ишазеиӷьу.

Аҳәынҭқарра Ахада иазгәеиҭеит Аԥснытәи амандаринақәа ашықәс ҿыцазтәи аныҳәа иахәҭакны ишыҟалаз, зны-зынла Китаии Испаниеи рҟынтәи аалыҵ Аԥснытәиуп ҳәа ишырҭиуагьы уи ахаҭабзиара ишаԥырхагамхо, ахатәы тауар азы агәадура шышьҭнахуа.

Атәыла Ахада иажәақәа рыла, Аԥсны ақыҭанхамҩа ахырхарҭа ҿиоит, уи азы абиуџьеттә инвестициақәеи апрограммақәеи ахархәара рыҭоуп. Бадра Гәынба иазгәеиҭеит аграртә сектор аҿиара афатә-ажәтә ала аиқәыршәара адагьы, ақыҭақәеи, акультуреи, абызшәеи реиқәырхаразы акрызҵазкуа зҵаараны ишаанхо.

Аҳәынҭқарра Ахада Урыстәыла ақыҭанхамҩа Аминистрра иҭабуп ҳәа реиҳәеит иааиԥмырҟьаӡакәа иҟарҵо адгыларазы. 2018 шықәса раахыс Аԥсны иаиуит 330 миллион мааҭ рыхә агуманитартә цхыраара, иара убас ақыҭанхамҩатә техникеи атракторқәеи. Бадра Гәынба агәыӷра ааирԥшит аминистр лаара аусбарҭақәа рыбжьара аусеицура аҩаӡара ҳаракы аҟынӡа ишнанаго ала.

Аинвестициақәа дрылацәажәо, дазааҭгылеит аҳәынҭқарра аҟынтәи адагьы, аҵыхәтәантәи ашықәсқәа рзы ареспубликахь ахатәы инвестициақәа аауа ишалагаз. Атәыла Ахада иазгәеиҭеит ақыҭанхаҩатә банк акредит ҷыда аҭара апрограмма ишалахәу, уи аҭыԥантәи анхацәеи аҭыжьыҩцәеи ишрыцхраауа.

Бадра Гәынба иазгәеиҭеит Владимир Владимир-иԥа Путин икоманда иабзоураны Урыстәыла иахьа адунеи аҿы ақыҭанхамҩатә аалыҵ мҽхакы ҭбаала изҭиуеи иаазхәои ишреиуоу, алҵшәа дуқәа шрымоу.

«Аусеицура Аԥсназы ҳаҭыр дууп , ареспублика адгьылтә ресурсқәа рацәаны ишамамгьы, акагьы иаламҩашьо аграртә хаҿра еиқәнархоит», - иҳәеит Гәынба.

Иазгәаҭан, ҵыԥх абри аамҭа иаҿырԥшны иаҳгозар атәылақәа рыбжьара аграртә аалыҵ атауареикәыршара 17% рҟынӡа ишеизҳаз.

Урыстәылатәи аекспорт 20% рыла еиҳахеит. Урыстәылантәи еиҳарак Аԥсныҟа иахыргоит иџьбарам арыжәтәқәа, аҭубарқәа, ашыла, ачалыхқәа, ахаа-мыхаақәа.

Аԥснытәи Урыстәылаҟа иахыргоит амандарина, абна какан, асыӡбал, аҩқәа уҳәа еиуеиԥшым аалыҵ.

«Урыстәыла азыхиоуп иаҭаху аалыҵ зегьы Аԥсныҟа аагара. Уахь иаҵанакуеит аграртә сектор аҿиаразы ареспублика иаҭаху аминералтә рҵәыгақәагьы», - лҳәеит Оксана Лут.