Ари амузыкатә проект  аԥҵара лаҧшьгамҭоуп уаанӡа Аҟәатәи афбатәи абжьаратә школ аҟны амузыка арҵаҩыс аус зуаз, 10-шықәса инарзынаҧшуа ахәыҷбаҳча «Алакә» аҟны амузыкатә напхгаҩыс   иҟоу, амузыкант  Радеда Гыц-ҧҳа.

Уи ҳаиҿцәажәараан иазгәалҭеит, еиуеиҧшым аныҳәақәа, аусмҩаҧгатәқәа раан ахәыҷқәа рықәра иаҵанакуа, инарыгӡаша аҧсышәала иаҧҵоу ашәақәа маҷны ишуҧыло, уи аганахьала ауадаҩрақәа шыҟоу. «Ари апроблема сгәы иҵхоижьҭеи акыр ҵуан, уи арманшәалара сацхраарц сыӡбеит еицырдыруа еиҳарак аурыс  иара убас, англыз бызшәақәа рыла иаԥҵоу, еиуеиҧшым атемақәа ирыҵаркуа, ахәыҷтәы ашәақәа аҧсшәахь реиҭагара ала. Уажәазы аҧсышәала  еиҭазгаз ашәақәа жәаба ҭыжьуп, даҽа жәаба аредакциа азуны, аус адуланы, аҭыжьра иазырхианы ишьҭоуп», – лҳәеит атекст аиҭагара лара лзы ишџьабаамыз азгәаҭо ари амузыкатә проект автор Радеда Гыц-ҧҳа. Уи лажәақәа рыла, зынӡа еиҭалгахьоу ашәақәа рхыҧхьаӡара наӡоит 35-40 рҟынӡа, аҧхьаҟа иацылҵарц, ихалырҭәаарц лгәы иҭоуп. «Ахәыҷқәа рзы ашәақәа ралҧшаара аан хырҩа асҭоит, зегь раҧхьа дара ирышьашәалоу, уи инаҷыданы, ауаажәлар рҟны еицырдыруа, бзиа еицырбо ашәақәа», – лҳәеит уи.

Ҳаиҿцәажәараан, Радеда дазааҭгылеит еиҭалгаз ашәақәа аредакциа шазыруз Аҧсуаҭҵааратә институт аусзуҩцәа Инал Гыцбеи Сусанна Ҭаниеи. Анаҩс, аԥсуа естрадатә шәаҳәаҩы Ильда Қәычбериа-ҧҳаи лареи русецурала уи напхгаҩыс дызмоу ахәыҷтәы студиа «Назареҭ» аҟны, ашәақәа ахәыҷқәа инарыгӡартә аҭагылазаашьа аҧырҵеит. Радеда инаҵшьны иазгәалҭеит аҧышәа змоу аҧсуа шәаҳәаҩ Ильда Қәычбериа-ҧҳа илыбзоуроу шырацәоу аҧсышәала еиҭагоу ашәақәа аҧсҭазаара рыҭараҿы. «Уи мызкала ахәыҷқәа ашәақәа длырҵеит, инарыгӡартә аҭагылазаашьа аҧылҵеит», – лҳәеит аамҭа кьаҿк иҭагӡаны илыллыршаз шмаҷым азгәаҭо. Ашәақәа аус рыдуланы, уи аҿиара иацыз аетапқәа зегьы ианырхыжьха ашьҭахь, ашәақәа жәаба ҭаҩхеит Аҧсны зҽаҧсазтәыз ашәаҳәаҩ Артур Лакрба ибзоурала, уи истудиа аҟны.

Имҳәакәан высшьа амам ҿыц ихацыркхаз амузыкатә проект аҧҵара, ацхыраареи адгылареи шарҭаз Аҟәа ақалақь Ахадара аҵара Аусбарҭа. «Хаҭала, иҭабуп ҳәа ласҳәоит Аҟәа ақалақь аҵара Аусбарҭа аиҳабы Астанда Ҭаркьыл-ԥҳа  иҟалҵаз ацхырааразы», – лҳәеит амузыкатә проект автор.

Уажәазы иҭыжьу ашәақәа жәаба Телеграмм-канал аҟны иаҧҵоу «Известные песни, переведенные на абхазский язык» захьӡуи, хаҭала, Радеда Гыц-ҧҳа лхатә даҟьеи рҟны ахархәара аҭара рылшоит ахәыҷбаҳчақәеи алагарҭатә классқәа рҟны аус зуа арҵаҩцәеи. Иҭаҩу ашәақәа ирыцуп афонограммақәа (минус), иара убас, аиҭага текстқәа. Ҳаиҿцәажәара хыркәшо, амузыкант Радеда Гыц-ҧҳа иазгәалҭеит, Аԥсуа ҳәынҭқарратә музеи аусзуҩ, апоетесса Илона Кәыҵниа-ԥҳа лнапы ишыҵлыжьыз  даҽа 10-ашәак, урҭ мазеины, аҭыжьра иазырхианы ишышьҭоу, ҳазҭоу аҵарашықәс нҵәаанӡа  рҭыжьра шалыршахо.

Алиса Гәажә-ҧҳа