Аусмҩаԥгатә актәи амш азы Аԥыза-министр ихаҭыԥуаҩ  Вараздаҭ Миносиан зхадараҿы дыҟоу Аԥснытәи аделегациа ахаҭарнакцәа афорум еиуеиԥшым атематикатә сессиақәа рхы аладырхәит.   Красноиарск иара убас имҩаԥысит Аԥснынтәи ара аҵара зҵо астудентцәа рԥылара. Урҭ Сибратәи Афедералтә университет агастрономиа Аинститут аҿы аҵара рҵоит. Урыстәыла аганахьала уи рхы аладырхәит Красноиарсктәи атәылаҿацә агубернатор иусбарҭа анапхгаҩы ихаҭыԥуаҩ Иулиа Верхушкина, агастрономиа Аинститут адиректор, Bellini аицаԥҵаҩы Алеқсеи Горенски, иара убас апрофильтә усбарҭақәа рхаҭарнакцәа; аԥсуа ган аҟынтәи -  Аԥыза-министр ихаҭыԥуаҩ Вараздаҭ Миносиан, Аԥсны атуризм Аминистрра ахаҭарнак Инaра Бениа, ақыҭанхамҩа Аминистрра аекономика аҟәша аиҳабы Беслан Папба, «Акурорт Пицунда» апансионатқәа реидгыла ахаҭарнак Азамаҭ Багаҭелиа, Ареспублика

Аԥсны апрофильтә усбарҭақәа рнапхгаҩцәа. Урыстәыла Ахада Иусбарҭа аӡбамҭала Аԥсны Ахада идгыларала сынтәатәи аԥхынразы ареспубликаҿы имҩаԥысит Сибратәи Афедералтә университет агастрономиа Аинститут аҿы аҵаразы аконкурс.

 Уи алҵшәақәа рыла, быжьҩык хәыда-ԥсада аҵаразы иарбоу аҵараиурҭа иахыԥхьаӡалахеит. Аиԥылараҿы астудентцәа аконкурс алахәхаразы агәалаҟазаара рызҭаз, аҵара апроцесс иаҵоу ауадаҩрақәеи аҷыдарақәеи ирылацәажәеит. Убри аан урҭ инаҵшьны иазгәарҭеит араҟа апрофессионалтә еизҳаразы зыҩаӡара ҳараку азыҟаҵара шыҟоу. Вараздат Миносиан Урыстәылатәи аган ахаҭарнакцәа иҭабуп ҳәа реиҳәеит Аԥсны иалҵыз аҿар аҵаразы ироуз алшаразы. Уи иазгәеиҭеит ареспублика анапхгара урҭ ганрацәала адгылара шрынаҭало.