Ихәарчаруаз амши аӡхыҵреи иннамкылакәа, акрызҵазкуа абри ахҭыс бзиа иахьалацәажәоз еизеит хыԥхьаӡара рацәала, апоет иҩызцәа аҵарауаа, иҟазара, иуаҩра, иаҳаракыра ҳаҭыр ақәызҵо ауаа. Иара убас аҳәынҭқарра анапхгара рхаҭарнакцәа.
Асасцәа бзиала шәаабеит ҳәа раҳәо аиԥылара ааиртит аинститут анапхгаҩы Арда Ашәба. «Пицундатәи алитфонд иазку ашәҟәы аԥҵара аҵак ду амоуп, 30 шықәса рыҩнуҵҟа Владимир Занҭариа дзыхьӡахьоу, адунеитә литератураҿ ҿыцрак ыҟазар иалкаан игәазҭо ирҿиара ҳара ҳзын акыр иаԥсоуп", – иҳәеит уи иқәгылараҿы. Анаҩс ажәа иман афилологиатә ҭҵаарадыррақәа рдоктор Уасил Аҩӡба. «Владимир Занҭариа зегь реиҳа ижәлар дызлеицырдыруа ирҿиаратә усурала ауп. Иара ирҿиара махәҭа рацәала еиларсуп. Д.И.Гәлиа ихьӡ зху Пицундатәи алитфонд иазку ашәҟәы аҿы автор иажәабжь аиҭаҳәара далагеит харантә, Урыстәыла аимпериа ахаантәи аамҭа аарԥшарала.
Ҩышықәса ирылагӡаны иара иҭижьит хышәҟәык: ажәеинраалақәа реизга «Сара ақалақь ажәҩан сызхом», «Абхазский мир в художественном осмыслении русских классиков», «Культурни оазис Пицундского литфонда». Аҩбатә ашәҟәы азкуп аурыси шәҟәыҩҩцәа Аԥсны рыҟазаара, ҳашәҟәыҩҩцәеи дареи реиҿцаара, рырҿиаратә еимадарақәа. Иаҳа академиатә ҟазшьа амоуп. Араҟа аԥхьаҩ иԥылоит Л.Толстои, А.Чехов,А.Твардовски, Н.Шолохов, Н.Тихонов, Е.Евтушенко уҳәа убас егьырҭгьы. 1968 шықәсазы ауп Пицундатәи алитфонд аргылара ианалагаз, усҟан рџьабаа ду адырҵеит архитектор Михаил Посохини анџьныр Ҭамара Гыцбеи. Автор ари ашәҟәаҿы еиҳа дыззааҭгыло асасцәа ашәҟәыҩҩцәа роуп, араҟа иаагоуп ахҭысқәа рацәаны, урҭ ируакуп Аԥсны ашәҟәыҩҩцәа реизарак аҿы ақырҭуа шәҟәыҩҩык иқәгылара аҿы ара иахьыҟоу ақырҭуа дгьылуп ҳәа ииҳәаз. Убасҟан Денис Чачхалиа уи аҭакс иҟаиҵаз ари –Аԥсны, аԥсуа иԥсадгьыл шакәу ҳәа, аиашазы, аурыс шҟәыҩҩцәа уи иқәгылара ргәаԥхеит. Асовет Еидгыла анхыбгала,ашьҭахь Аԥсны иԥсы ишьон Ҭемыр Гаидар, ус иаб аҭел дасны иеиҳәеит «арахь ухынҳәы Аԥсны аибашьра иалагоит» ҳәа. Владимир Занҭариа иазгәеиҭеит Аԥсны Литфонд ишаҭаахьаз аҳәаанырцәтәи ашәҟәыҩҩцәа: Џьон Пристли инаиркны, хыԥхьаӡара рацәала, аха урҭ Аԥсны иазкны ак рыҩхьазаргьы издыруада, изыԥшаада?
Уасил Аҩӡба иҟаиҵеит ажәалагала «Аԥсны алитературатә музеи аԥҵаразы», уи азҵаара Аԥсны ашәҟәыҩҩцәа Реидгылеи Аԥсны ашәҟәыҩҩцәа Рассоциациеи Атәыла Ахадара рҿаԥхьа иқәдыргылар ауп, ирыӡбароуп, хымԥада.
Апоет, ажурнал «Аҟазара» аредактор хада Геннади Аламиа иазгәеиҭеит, Владимир Занҭариа ирҿиамҭақәа ҳлитература ишагәылыҷҷаауа, изеиӷьишьеит иҵегьы арҿиамҭа бзиақәа. Даԥхьеит иара убас Владимир Занҭариа изикыз ажәеинраала.
Аԥсны ашәҟәыҩҩцәа Реидгыла ахантәаҩы Вахтанг Аԥҳазоу далацәажәеит алитфонд иазку ашәҟәы, ари Аԥсны аԥшӡара, мацара акәымкәа ҳажәлар рдоуҳатә беиара иамоу шаныԥшуа. Асовет аамҭазы ашәҟәыҩҩцәа дуқәа меихсыӷьрада еиҿцаауан, еиуеиԥшым адекадақәа, аконференциақәа, астол гьежьқәа еицымҩаԥыргон. Усҟан СССР ашәҟәыҩҩцәа Реидгыла алитфонд еиҳабыс дыҟан Алим Кешоков, убри ибзоуроуп Пицунда алитфонд аргылара. Пицунда еиқәшәон ашәҟәыҩҩцәа дуқәа реиԥш, аиҭагаҩцәагьы.
Владимир Занҭариа ишәҟәы аӡыргара, ҳажәлар рмилаҭ культура амҽхак шдуу, аҿиара шамоу ауп иаанаго.
Пицундатәи алитфонд аҟны уаанӡа иҟаз ыҟам иахьа, аха аиҭакра бзиақәа уаҩы ибоит, аԥсшьаҩцәа ҳҭоурыхгьы, ҳкультурагьы иазҿлымҳауп. Уаанӡа Вианор Ԥачлиа Аԥсны аӡыргараз ииҩуаз, иҟаиҵаз даара ирацәан, иахьа уи дзыԥсахуа даҳмоуӡеит. Ҳасасцәа ирҭахуп урысшәала иҟоу, абас еиԥш Владимир Занҭариа ишәҟәы аиԥш иҟоу аматериал беиа», иҳәеит иара.
Ашәҟәы аӡыргараҿ адныҳәаларақәа ҟарҵеит аҵарауаҩ Виачеслав Бигәаа, аԥсуаҭҵааратә институт аусзуҩы Инал Гыцба, апоетесса Белла Барцыц, Ҟарачы-Черқьесиа Жәлар рпоет Лариса Шыбзыхәа, апоетесса Гәында Сақаниаԥҳа, ауниверситет аҟазара афакультет адекан Нугзар Логәуа.
Аҵыхәтәан Владимир Занҭариа ишәҟәы аӡыргара иалахәыз зегьы иҭабуп ҳәа реиҳәеит, иара ишиҵасу еиԥш алафгьы рыгимырхеит, ирзеиҭеиҳәеит ҳашәҟәыҩҩцәа дуқәа Баграт Шьынқәба, Алықьса Гогәуа, Шьалодиа Аџьынџьал, Алықьса Џьениа ирыдҳәалаз игәалашәарақәа.

Наира Сабекиа