Раԥхьа  Аҳәынҭқарра Ахада Аԥсны Аџьынџьтәылатә еибашьраҟны иҭахаз ақыҭа ауааԥсыра ҳаҭырла игәалаиршәеит. 

  Аиааира 30 шықәса ахыҵра инамаданы иргылаз ақыҭаҟнытә иҭахаз рбаҟа ахәҭақәак хыркәшаӡам. Аҳәынҭқарра Ахада адҵа ҟаиҵеит Аиааира Амш азынӡа аусурақәа рхыркәшаразы.

Анаҩс Аҳәынҭқарра Ахада ақыҭа аиҳарак ӡыла еиқәзыршәо аӡеизакырҭа дахәаԥшны ибеит.  Аӡымҩангагақәа рыхәҭак ахьажәыз иахҟьаны аӡы рацәаны ирцәыӡуеит,  ақыҭауаа рызхара рауӡом, урҭ рырҿыцра аҭахуп. 

Аҳәынҭқарра Ахада шьаҭанкылатәи аргылара Аусбарҭа аиҳабы Демир Гамсаниа  инапы ианиҵеит хара имгакәа апроект-харџьынҵатә қьаадқәа азырхианы аӡеизакырҭа арҽеира нап аркра, иара убас иажәыз аӡымҩангагақәа  рыԥсахра.

Ақыҭа фымцала аиқәыршәара аҭагылазаашьа, егьырҭ ақыҭақәа рҿы ишыҟоу еиԥш иуадаҩуп. Ахада инаҵшьны иҳәеит ақыҭаҟны иҟоу ауадаҩрақәа ашықәс анҵәамҭанӡа ишыӡбахо.

Иара убри аҽны Аҳәынҭқарра Ахада Бадра Гәынба Афон Ҿыц иҟоу аобиектқәак дырҭааны рҭагылазаашьа зеиԥшроу гәеиҭеит. 

 Иара раԥхьа дызҭааз аобиектқәа иреиуоуп ақалақьтә аполиклиника. Ари амедусбарҭаҿы иҟаӡам иахәҭоу амедицинатә маругақәа, иаԥҵам ачымазцәа рыдкыларазы ихымԥадатәиу аҭагылазаашьақәа. Иҟоу апроблемақәа шмаҷымгьы, аполиклиника амедицинатә персонал шықәсык ала 40 нызқьҩык ачымазцәа рыдыркылоит.  

 Аполиклиникаҿы иҟоу аҭагылазаашьеи уи  аусушьеи ртәы еилкааны, Бадра Гәынба ачымазцәа рыдкылареи урҭ зыквалификациа ҳараку амедицинатә цхыраара рыҭареи рзы аҭагылазаашьақәа реиӷьтәразы зыԥшрак ҟамҵакәа ауснагӡатәқәа мҩаԥгатәуп ҳәа инаҵшьны иазгәеиҭеит.

«Амедицинатә цхыраара аиуреи уи ахаҭабзиареи ишиашоу ауааԥсыра ргәабзиара анырра анаҭоит», –  инаҵшьны иазгәеиҭеит Аҳәынҭқарра Ахада.

Бадра Гәынба иара убас даҭааит зеиҭашьақәыргыларазы аусурақәа аамҭала иаанкылаз аспорттә зал. Уи атәыла анапхгара ԥарала еиқәдыршәарц, шьаҭанкылатәи аргыларазы Аусбарҭа иарбоу аобиект ҳазҭоу ашықәс нҵәаанӡа ахархәарахь рыҭара алнаршарц анапынҵақәа ҟаҵеит.

Аҳәынҭқарра Ахада даҭааит Афон Ҿыцтәи апарк аҿы иҟоу, хатәгәаԥхарала Аԥсны еибашьуаз, еицырдыруа апоет Алеқсандр Бардодым инышәынҭра. Иарбоу апарки анышәынҭреи гәыгәҭажьны иҟоуп. Асасааирҭатә комплекс ареконструкциа иаҿу аусдкылаҩцәа рхахьы иргеит апарктә зона аиҭашьақәыргылара, иара убас Алеқсандр Бардодым иԥсыжырҭа арҽеиреи, анаҩсгьы уи ҷыдала ахылаԥшра аҭареи.

Аҳәынҭқарра Ахада даҭааит иара убас аихамҩатә вокзал, араҟа аиҭашьақәыргыларатә усурақәа мҩаԥысуеит. Урҭ рхыркәшара ҳазҭоу ашықәс нҵәаанӡа иазԥхьагәаҭоуп.

Авокзал ахыбра аҭоурых-культуратә баҟақәа рзы ишьақәыргылоу аԥҟарақәа зегьы инарықәыршәаны еиҭашьақәыргылахоит.