Уи инақәыршәаны Ахада даҭааит ашьхаҳаракыраҿы иҟоу Дәрыԥшь ақыҭантәи аӡеизакырҭа, – иаанацҳауеит Аԥсны шьаҭанкылатәи аргылара Аусбарҭа апресс-маҵзура.

Аӡеизакырҭа ӡыла еиқәнаршәоит ақыҭақәа Хыԥсҭа, Ҟәланырхәа, Жәандәрыԥшь, Абӷархықә, Дәрыԥшь, Хәаԥ, Мгәыӡырхәа, иара убас Гәдоуҭа ақалақь ахәҭак. Араион аҟны аԥхынразтәи амзақәа рзы аӡеизакырҭаҿы аӡы амаҷхара иахҟьаны апроблемақәа цәырҵуеит.

Аусқәа рҭагылазаашьа атәы еиҭеиҳәеит шьаҭанкылатәи аргылара Аусбарҭа аиҳабы Демир Гамсаниа.

«Ауааԥсыра ӡыржәтәла реиқәыршәара азҵаара ҳара ҳзы ихадоуп. Амчқәа зегьы азктәуп ҳазну ашықәс азы уи азымхара иахьынӡауа армаҷразы. Шәара шәҟнытә ажәалагалақәа сырзыԥшуп, иара убас иаҭаху аусурақәа иаарласны рынагӡара. Урҭ хыркәшахароуп ҳазну ашықәс азы», – еихишьалеит Гәынба.

Атәыла Ахада Бадра Гәынба игәеиҭеит иаарласны Лыхны ақыҭан иаадыртраны иҟоу ахы иақәиҭны аиқәԥареи абокси рзал аҟны арҽеиратә усурақәа рымҩаԥысшьа.

Азал аартра азыӡбан маи 18 азы Гәдоуҭа араион ашҟа аҳәынҭқарра Ахада иныҟәараан. Убасҟан, мышқәак ааҵуаны ахыбра азыҟаҵаразы аусурақәа хацыркын.

Арҽеирақәа рымҩаԥысшьа атәы далацәажәеит шьаҭанкылатәи аргылара Аусбарҭа аиҳабы Демир Гамсаниа.

Гәынба иаҵишьит аҿар рхазҩыдаразы аспорттә хыбрақәа акырӡа шрыҵаркуа.

Аргылаҩцәа аҳәынҭқарра Ахада агәра идыргеит уи инапынҵа иарбоу аҿҳәарала ишынагӡахо, аспорттә зал сентиабр азы ишаартхо.

Иара убас Ахада даҭааит Гәдоуҭатәи араионтә поликлиника. Уи аусзуҩцәа драцәажәеит, ибеит русура аҭагылазаашьақәа.

Амедицинатә усҳәарҭа шьаҭанкыла арҽеира аҭахуп.

Атәыла Ахада иарҳәеит аполиклиника шықәсык рымаҵ шауа 38 нызқьҩык инадыркны 40 нызқьҩык рҟынӡа. Уаҟа аус руеит 25-ҩык.

Бадра Гәынба шьаҭанкылатәи аргылара Аусбарҭа аиҳабы Демир Гамсаниа инапы ианиҵеит апроект-сметатә қьаадшәҟәқәа реиқәыршәара, аамҭа-аамҭала ахыбра арҽеира нап аркра, ахыб инаркны.

Гәынба иақәиргәыӷит аҳәынҭқарра аполиклиника ацхыраара шанаҭо.