Аганқәа рыхәаԥшит Аԥсни Шьамтәылеи рҳәынҭқаррабжьаратә усеицура иаҵанакуа азҵаарақәа жәпакы, иара убас арегионтәи жәларбжьаратәи амш аусхәаԥш хра злоу азҵаарақәа, ахәҭакахьала, Мрагылара Аигәа иҟоу аҭагылазаашьа.

Олег Барцыц Асад Ҳасан Аль-Шаибани ҭабуп ҳәа иеиҳәеит иԥхаӡа адкыларазы, иазгәеиҭеит Аԥсни Шьамтәылеи рыжәларқәа реизыҟазаашьақәа аҭоурыхтә дац-ԥашә ҵаулақәа шрымоу.

Барцыц иара убас Шьамтәылатәи иҩыза ҭабуп ҳәа иеиҳәеит Аԥсны аҟны аҳәынҭқаррабжьаратә усеицура ҳаԥхьаҟагьы арҿиареи арӷәӷәареи рызҵаарақәа рганахьала Шьамтәыла анапхгара иааныркыло азнеишьа азы.

Аԥсны атранзиттә лшарақәа ҳасаб рзуны, аиԥылараҿы ирылацәажәеит амшын сқьалақәа ахрархәарала атранспорт-логистикатә инфраструктура арҿиара амҩақәагьы. Абри аҩыза азнеишьа иалнаршоит атәылақәа рыҩбагьы рыбжьара ахәаахәҭреи абизнеси рырҿиаразы азԥхьаҭагылазаашьақәа раԥҵара.

Аиԥылара аан ишьақәырӷәӷәан наҟ-ааҟ рыҽшазыршәо атәылақәа рыбжьара аусеицура арӷәӷәалара, зегь рыла арҿиалара, аекономикеи акультуреи рҟны аимадарақәа рырҭбаалара. Аиԥылараҿы иара убас иалацәажәеит август 27 инаркны сентиабр 5 азынӡа имҩаԥысуа 62-тәи Дамасктәи Жәларбжьаратәи Аџьармыкьа Аԥсны алахәра. Уи арегион аҟны жәларбжьаратәи цәыргақәҵа-џьармыкьа дуны иҟоуп.

Мрагылара Ааигәаҿы аҭагылазаашьа аҿиашьа инамаданы Аԥсны адәныҟаполитикатә усҳәарҭа ахада иҳәеит: «Ҳара иаабоит, Шьамтәыла анапхгара рҽазышәарақәа шазыркуа атәылаҿы аҭышәынтәалареи ашәарҭадареи рырӷәӷәара, Шьамтәыла ажәлар рыԥсҭазаара аҩаӡара аиӷьтәра.

Аиԥылара аҵыхәтәан Аԥсны адәныҟатәи аусқәа Рминистрра ахада Шьамтәылатәи иколлега аҳамҭақәа ианеишьеит, иара ианизыманшәалоу аамҭазы Аԥсныҟа дааиԥхьеит.

Олег Барцыц иара убас Аԥсны Ахада Бадра Гәынба ихьӡала аҳамҭақәеи ианизыманшәалоу аамҭазы Шьамтәыла Ахада Аҳмед Хусеин аш-Шараа Аԥсны даҭаарц ааԥхьара шәҟәи ииҭеит.

Аԥсны аганахьала аиԥылара иалахәын адәныҟатәи аусқәа рминистр ихаҭыԥуаҩ инапынҵақәа назыгӡо Иракли Ҭыжәба, Шьамтәыла иҟоу Аԥсны ацҳаражәҳәаҩ Муҳамад Али, Шьамтәылан Аԥсны Ацҳаражәҳәарҭа абжьгаҩ Жанбу Агрба, Гаис Аль-Харки.

Олег Барцыц Шьамтәыла иҟазаара аан аԥсуа-адыга, ачерқьес диаспорақәа реиҿкаарақәа рхаҭарнакцәа алархәны аиԥыларақәа жәпакы мҩаԥигеит, – иаанацҳауеит Аминистрра апресс-маҵзура.

Аиԥыларақәа мҩаԥысит адиаспорақәа рхаҭарнакцәа алархәны: Адыга-Хасе ахантәаҩы Гасан Шора, ачерқьестә гәыҳалалратә ассоциациа «Адгылара» ахантәаҩы Абдул Рахман Багасы, Кисуа араион аҟны аԥсуа-черқьес диаспора ахантәаҩы Фахми Абаза. Адиаспора ахаҭарнакцәа иԥхаӡа ирыдныҳәалеит Аԥсны аделегациа.

Ирылацәажәан адиаспора рыдгылара азҵаара хадақәа, урҭи дара рҭоурыхтә ԥсадгьыли реимадарақәа рырӷәӷәара. Аиԥылара иалахәыз аинтерес аадырԥшит Шьамтәылаҟа аминистр инеира ашҟа. Олег Барцыц иреиҳәеит адәныҟатәи аусқәа рминистр Асад Ҳасан Аль-Шаибани иҟны имаз аиԥыларақәа ртәы, иазгәеиҭеит аполитика аиԥш, иара убас ахәаахәҭра-економикатә зҵаарақәагьы ишрылацәажәаз. Шьамтәылатәи аган иазгәанаҭеит Аԥсны аҟны аизыҟазаашьақәа рырӷәӷәара ишадгыло.

Аминистр иақәиргәыӷит рҭоурыхтә ԥсадгьыл ахь рааразы аҭагылазаашьақәа раԥҵара дшацхраауа, иаҵишьит Аԥсны анагӡара ишаҿу адиаспорақәа рхаҭарнакцәа рҵарадырра адгыларазы аҳәынҭқарратә программақәа.

Олег Барцыц Аԥсны Ахада Бадра Гәынба ихьӡала азеиӷьашьара бзиақәа риҭеит, иаҵишьит Аԥсны анапхгара хшыҩзышьҭра ҷыда шырзыруа аҳәаанырцә инхо ҳџьынџьуаа, урҭ рыдгыларагьы ишацырҵо.

Аԥсны адәныҟатәи аусқәа Рминистрра ахада иара убас даҭааит аԥсуа хылҵшьҭра иеиуоу еицырдыруа Шьамтәылатәи ашәҟәыҩҩ Фадиль Арҩҭаа инышәынҭра.