Уи инаҵшьны иазгәеиҭеит Петербургтәи жәларбжьаратәи аекономикатә форум – ари Урыстәылаҿы мацара акәымкәа, адунеи аҟынгьы акырӡа зҵазкуа афорумқәа ишыруаку.

Абасеиԥш иҟоу афорум Ахадеи Аԥсны аделегациеи ралахәра ҳтәылазы, аимадара ҿыцқәа рышьақәыргыларазы, аинвестициақәа радыԥхьаларазы аҵак ду амоуп», – иҳәеит иара.

Ииун 18-19 рзы Бадра Гәынба Урыстәыла аҳәынҭусбарҭақәеи анападкылаҩцәеи рхаҭарнакцәа рҟны аиԥыларақәа жәпакы иман. Арҭ аиԥыларақәа мҩаԥысуан астол гьежьқәа ирыдтәаланы, иара убасгьы ршьапы ишықәгылаз.

Аҳәынҭқарра Ахада диԥылеит Санкт-Петербург агубернатор Александр Беглов.

«Санкт-Петербург Урыстәыла аҩбатәи аҳҭны-қалақь ҳәа иршьоит. Аекономикатә мчхара ду змоу регионуп. Агубернатор иԥылараан иалацәажәон Аԥсны Аҳәынҭқарреи Санкт-Петербурги рбжьара аиқәшаҳаҭра анапаҵаҩра азҵаара. Санкт-Петербург агубернатор азҿлымҳара ду ааиԥшит Аԥсны ацхыраара аҭаразы. Аганқәа еицәажәеит аиқәшаҳаҭра аусадулара ишалаго азы», – адырра ҟаиҵеит Ҷолокуа.

Бадра Гәынба иара убас диацәажәеит Тамбовтәи аобласт агубернатор Евгени Первышов. Аҟәеи Тамбови аешьара зыбжьоу қалақьқәоуп. Аиԥылараҿы агубернатори ахадеи еицәажәеит Аԥсни Тамбовтәи аобласти рыбжьара аиқәшаҳаҭра ду анапаҵаҩразы, Тамбови Аҟәеи рыбжьара авиаеимадара аартразы.

«Абасеиԥш иҟоу азҵаарақәа ирылацәажәан Башкортосҭан анапхгара рԥылараҿгьы. Аԥсны Ахада диԥылеит арегион ахада Ради Хабиров. Башкортосҭани ҳареи акырҵуеит аизыҟазаашьа бзиақәа ҳабжьоижьҭеи», – иҳәеит Ҷолокуа.

 Иара убас Бадра Гәынбеи Ленинградтәи аоблост агубернатор Алеқсандр Дрозденкои еицәажәеит. Петербургтәи жәларбжьаратәи аекономикатә форум аусура иалагӡаны Тҟәарчалтәи араиони Ленинградтәи аоблост Приозерсктәи араиони рыбжьара аиҩызаратә еизыҟазаашьақәа рышьақәыргыларазы аиқәшаҳаҭра анапы аҵаҩуп.

«Бадра Гәынба диԥылеит аконцерн «КАМАЗ» анапхгаҩы. Иалацәажәеит Аԥсны иахьаҵанакуа адилертә центр аиҿкаара азҵаара. Уи аҭахуп атехника арҽеиразы. Аҳәынҭқарра Ахада иара убас диԥылеит «Росагролизинг» анапхгаҩы. Иалацәажәеит Аԥсны ақалақьқәеи араионқәеи рхадарақәа рзы атехника ҷыда аашьҭра. Ари даара акраҵанакуеит, иагьыфеидоуп. Ари азҵаара иҵегьы иалацәажәахоит», – иҳәеит Ахада ипресс-маӡаныҟәгаҩ.

Афорум аҟны Аԥсны Ахада диацәажәеит Аахыҵ-Уаԥстәыла Аԥыза-министр Константин Џьуссоев.

«Ҳтәылақәа реизыҟазаашьақәа ҷыдала аиҩызаратә ҟазшьа рымоуп. Ахьыԥшымра ашҟа амҩа ҳаицанысит, аӡәи-аӡәи ҳаидгылон, иара убас аҭынч ԥсҭазаара ашьақәыргылараҿгьы. Константин Џьуссоев Аԥсны Ахада днеиԥхьеит Цхинвал, сентиабр азы имҩаԥысран иҟоу Актәи жәларбжьаратәи аекономикатә форум аҽаралхәрахь. Бадра Гәынба ари ааԥхьара гәахәарала идикылеит», – иазгәеиҭеит Ҷолокуа.

Аԥсны Ахада драцәажәеит Афедерациа Ахеилак ахантәаҩы Валентина Матвиенко, Аҳәынҭдума апарламенттә фракциақәеи адепутатцәеи рнапхгаҩцәа, Урыстәылатәи Афедерациа аполитикатә, ауаажәларратә усзуҩцәа.

«Афорум аҟны хҭыс хаданы иҟалеит апленартә еилатәара. Уаҟа дықәгылеит Урыстәылатәи Афедерациа Апрезидент Владимир Путин. Ари ашықәсан акырӡа зҵазкуа хҭысуп. Уи интересла иазыԥшуп зегьы, ҷыдала амассатә информациа ахархәагақәа рхаҭарнакцәа, убрахь иналаҵаны аҳәаанырцәтәиқәагьы. Уаҟа, ԥҟарак аиԥш, Урыстәыла Апрезидент адунеитә политика, аҩнуҵҟатәи Урыстәылатәи аполитика уҳәа азҵаарақәа ирызкны ҵакыла ихаҭәаау аҳәамҭақәа ҟаиҵоит. Апленартә еилатәараҿы напхгаҩцәас иҟан Индонезиа Апрезидент Прабово Субианто, ИУАР Апрезидент ихаҭыԥуаҩ Пол Машатиле, Бахреин аҟрал ихаҭарнак, амилаҭтә шәарҭадаразы абжьгаҩ ашеих Насер бен Ҳамад Аль Халиф, Китаитәи Жәлартә Республика Аҳәынҭхеилак Аԥыза-министр ихаҭыԥуаҩ Дин Сиуесиан», – иҳәеит Алхас Ҷолокуа.

Хсааҭк раҟара ицон Бадра Гәынбеи Санкт-Петербург аԥсуа диаспореи реиԥылара.

Аиԥылара иалахәыз интересс ирыман Аԥсны имҩаԥысуа апроцесқәа, убрахь иналаҵаны аполитикагьы. Ахада ишҟа ирхаз азҵаарақәа азкын аԥсуа бызшәеи акультуреи рырҿиара, азинхьчратә усбарҭақәа русура, аинвестициақәа радыԥхьалара, имаҷуи ибжьаратәи абизнес арҿиара, адиаспора рыҩнуҵҟа аизыҟазаашьақәа. Абарҭ азҵаарақәа зегьы инҭкааны рҭак ҟаиҵет Бадра Гәынба», – иҳәеит апресс-маӡаныҟәгаҩ.

Иара убас аиԥылара иалахәын Санкт-Пкткрбург иреиҳау аҵараиурҭақәа рҟны аҵара зҵо Аԥснытәи астудентцәа. Урҭгьы Ахада азҵаарақәа рацәаны ирҭеит. Изызкыз Аԥсны аҭҵаарадырратә усура аҿар ралахәра, рҵара анхдыркәшалак ашьҭахь усурҭа ҭыԥла реиқәыршәара, Рыԥсадгьыл ахь рыхынҳәра акәын. Ахада иаҵишьит аҵак ҷыда шаиҭо аҿар ҳтәыла арҿиара ралахәра.

«Ахадеи аԥсуа делегациеи Санкт-Петербург рыҟазаара апрограмма даара интерес аҵан, хҭысла иҭәын. Абасеиԥш иҟоу афорумқәа аҽрылахәра аҭахуп Аԥсны арҿиаразы», – еихишьалеит Алхас Ҷолокуа.