Аԥхьаҩ дагәыланахалоит адырра ҵаулақәа рааԥҭра, дакәнаршоит еиуеиԥшым атәылақәа, убарҭқәа зегьы рхаҿы игылоуп, хымԥада абиблиотека аусзуҩцәа. Ус машәыршәа иҟамлеит маи 27 – Жәларбжьаратәи абиблиотека иамшны иахьазгәарҭо.
Аамҭаказы, СССР анхыбгала, акырӡа игәыгәҭажьны иҟан абиблиотекақәа русура. Аԥсны иҟоу абиблиотекақәагьы уи изацәцомызт, аха иахьа анцәа иџьшьаны урҭ русура есааира амҽхак арҭбаауеит. Имҩасуам хҭыск дара злахәым. Абиблиотека акультуратә хәышҭаарақәа ируакуп. Уахь рымҩа нагоуп аҿар, ирзаԥҵоуп атехнологиа ҿыцқәа рхархәарала ирҭаху ашәҟәқәа алрыԥшаартә аҭагылазаашьа бзиақәа.
Ҳара иҳамоуп ҳазлаҽхәаша, Аԥсны анҭыҵгьы еицгәарҭахьоу, еснагь аиҭанеиааира дуқәа мҩаԥызго Амилаҭтә библиотека, Борис Шьаликәа-иԥа Ҷолариа зхадараҿы дгылоу.
Ари аусура уахәаԥшны иумҳәарц залшом, И. Папасқьыр ихьӡ зху Амилаҭтә библиотека акультуратә хәышҭаарақәа ирхадароуп ҳәа. Анапхгаҩ бзиа азанааҭ адырра, егьырҭ атәылақәа рҟнытә аԥышәа ахархәара ирыбзоуроуп иахьатәи амҽхак аҭбаара.
Аԥхьаҩцәа рнаҩсангьы, ари абиблиотека иааиԥмырҟьаӡакәа Аԥсны имҩаԥысуа акультуратә усмҩаԥгатәқәа ирхыҵхырҭоуп. Ахьтәы цҳа рыбжьанаҵеит аҿари ҳарҿиаҩцәа дуқәеи. Абиблиотека иҩныҩуеит ҳпоезиа абжьы хаа, ара иазыхынҳәуеит азқьышықәсқәа иргәылсуа ҳҭоурых, уи инадкылан иҭырҵаауеит иааҳакәыршан иҟоу егьырҭ атәылақәеи, ажәларқәеи рдунеи ҭбаа. Абарҭқәа зегьы рхаҿы игылоуп хымԥада ааԥсарак ҟазымҵо, аентузиазм ҳаракы злоу – абиблиотека аусзуҩцәа дырқәа.
Акраҵанакуеит ҳара ҳзы ҳмилаҭтә библиотека аиҳабы есышықәса Аԥсны анҭыҵ имҩаԥысуа ахҭыс дуқәа рышҟа ааԥхьара ахьирҭо. Убас сынтәа, абарҭ амшқәа рзы ақалақь Ижевск имҩаԥысуаз есышықәсатәи XXIX Урыстәылазегьтәи абиблиотекатә конгресс далахәын Борис Ҷолариа. Ари аконгресс акраҵанакуеит абиблиотека аусзуҩцәа, апрофессионалцәа русеицуразы. Иарӷәӷәоит абиблиотекақәа реимадарақәа. Аконгресс аҳәаақәа ирҭагӡаны еиҿкаахоит иара убас асаммит амилаҭтә библиотекақәа рзы, еиҿцәажәеит Урыстәылеи Индиеи рбиблиотекақәа рхадацәа. Убраҟа ҳбиблиотека ахада иалахәхара аҵак ду амоуп.
«Ҳара Урыстәылатәи абиблиотекақәа акырӡа ҳрымадоуп, ҳаиднакылоит адоуҳатә дунеи ҭбаа, уи ҳусураҿы ицхыраагӡа дууп. 1992-1993 Аџьынџьтәылатә еибашьра ашьҭахь Урыстәылатәи абиблиотека аусзуҩцәа, ҳколлегацәа, иаҳзыҟарҵаз ацхыраара хәызмаӡам акоуп», – азгәеиҭеит Борис Ҷолариа.
Аконгресс иалахәыз Удмурттәи амилаҭтә библиотека ахадара ҳбиблиотеказ ашәҟәқәа ҳамҭас иарҭеит. Уи ашьҭахь аконгресс иалахәыз зегьы еиҭарҳаит аиҩызаратә паркаҿы аҵлақәа, гәаларшәагас, ҳаиҩызара, ҳаиашьара иадырганы.
Иалкаатәуп убас, ари аконгресс Аџьынџьтәылатә еибашьра Ду аҟны игаз Аиааира 80 шықәса ахыҵреи, Урыстәыла абиблиотекатә ассоциациа 30 шықәса ахыҵреи инарықәыршәаны ишымҩасуа, иаку атема «Аиааира . Ҳаӡәыкхар ҳаӷәӷәахоит» алозунг ала.

Наира Сабекиа