Гагра ақалақь асасааирҭа «Astoriya» аҟны иаартхоит аԥсуа сахьаҭыхҩцәа хәыда-ԥсада русумҭақәа рӡыргара ахьрылшо ацәыргақәҵатә зал. Ари льготала акредит аҭара апрограмма ала Аԥсны раԥхьаӡакәны аусура иалагоит аҟазаратә сасааирҭа.
Асасааирҭа анапхгаҩы, уи аус аҿы аԥышәа змоу Илона Амԥар 1000 инареиҳаны ажәеинраалақәа дравторуп. Лара лнапхгарала иаартуп асаааирҭақәа 5, уаҟа аус руеит 400-ҩык инарзынаԥшуа ауаа, аха лара еснагь лгәы иҵхон – ари аус аҿы иҵаулоу акультуратә аспект ахьыҟам. Убри аҟынтә лара иазгәалҭеит есымша агәаҳәара шлымаз атуризми аԥсуа традициақәеи акультуреи ареспублика ауааԥсыреи Аԥсны иаҭаауа асасцәеи рҟны аларҵәара.
Асеиԥш иҟоу асахьаҭыхратә сасааирҭа аԥсуа ҟазацәа, насгьы ҳтәыла иаҭаауа аҟазара злоу ауаа радыԥхьалара хықәкыс иамоуп.
Асасааирҭа анапхгаҩы Илона Амԥар лгәазыҳәара анагӡаразы, уи азааигәара иргылахоит 200 квадраттә метра зҵазкуа ҩ-еихагылак змоу агалереиа, асахьаркыратә ҭыхымҭақәа рыла иҩычахоит уи аҭӡамцқәа. Ахыбрақәа еиуеиԥшым апаннельқәа рыла ирԥшӡахоит, аресторан ахаҭаҟны ажәытә архитектуратә баҟақәеи, зҭоурых ҵаулоу аҭыԥ ԥшӡарақәеи аарԥшхоит. Уаҟа аусура рылшоит аҭыԥантәи асахьаҭыхҩцәа заҵәык.
Иара убас асахьаҭыхҩцәа алшара роуеит хәыда-ԥсада рхатәы цәыргақәҵақәа рымҩаԥгара. Уи анаҩсангьы агалереиаҿы аскульптурақәеи анаплыхымҭақәеи рцәыргақәҵа мҩаԥгалахоит. Ихадоу хықәкыуп аԥсуа доуҳа, аԥсуаа рыбзазашьа, ртрдициақәа, инарҵауланы раарԥшра.
Ас еиԥш иҟоу аҟазаратә сасааирҭа аргылара иалагеит 2022 шықәсазы, аха еиуеиԥшым аҭагылазаашьақәа ирыхҟьаны, шықәсык иназынаԥшуа уи аусура аанкылахеит. Анаҩс 2024 шықәсазы арзаҳал шьҭын Урыстәылатәи акредитә льготатә программа алахәхаразы, ақәшаҳаҭра анаиу ашьҭахь, ноиабрмзазы аусура иацҵан.
Аҟазаратә сасааирҭа анапхгаҩы агәыӷра аалырԥшуеит 2025 шықәсазы аусура иалагап ҳәа. Асасааирҭа 166-ҩык ауааԥсыра рыԥсы ахьыршьаша 33 уада рыла еиқәыршәоуп. Иара убас иаартхоит х-ӡҭачык, уи идуу, ибжьаратәу, насгьы ахәыҷқәа рзыҳәан. Убасгьы еиҿкаауп асасцәа рыԥсы ахьыршьаша иҷыдоу аҭыԥқәа.
Асасааирҭа «Astoriya» аартра инамадан, аԥхынтәи аԥсшьара аамҭазы 58 усурҭа ҭыԥ роуеит аҭыԥантәи ауааԥсыра.
Аманда Анталаа
