Аусмҩаԥгатә хацыркуа иқәгылаз аҳәынҭқарратә бызшәатә политиказы аҳәынҭқарратә усбарҭа аиҳабы Гәында Кәыҵниаԥҳа иҳаҩсыз ашықәс азы имҩакԥыргаз аусура иазкны аҳасабрба ҟалҵеит. Илымҩатәны дазааҭгылеит аҵыхәтәантәи ҩышықәса ирылагӡаны ишҭыжьц 9525 екземплиар ашәҟәқәа, аинтерактивтә планшет «Аилыҷҷа» 1500 цыра, аплакатқәа –3500, аудиошәҟәқәа «Иссиру ашьҭыбжьқәа» –200 убрахь иналаҵаны.
«Иҭыжьу реиҳараӡак ахәыҷтәы литература иаҵанакуеит. Агәаакнагара ыҟоуп урҭ ахәыҷқәа рааӡараҿы хәарҭара рылазаауеит, насгьы ахатәы бызшәа иазҿлымҳахартә еиҿкаауп ҳәа», азгәалҭеит лара.
Ҩышықәса рыла иҭыжьу ашәҟәқәа иреиуоуп: Анзор Мықәба иҩымҭа «Жьабаӷь фырхаҵа», Владимир Аҵнариа авторс дызмоу «Сыԥсадгьыл Амра», Платон Бебиа – «Амра ԥхоит», Анатоли Лагәлаа иажәеинраалақәа реизга «Ашьхыц», Маиа Амҷба – «Ирхәмару алакәқәа, Гәында Сақаниа – «Ашәҭқәа рашәа», «Аамҭеи асааҭи», Диана Шамба – «Иссиру ашьҭыбжьқәа», Ҳанс Христиан Андерсен – «Алакәқәа» (аԥсшәахь аиҭагаҩ – Сергеи Зыхәба) уҳәа егьырҭгьы.
«Ашәҟәқәа зегьы Краснодар иҭыжьуп, хара имгакәа иаагахоит иара убас иҭыҵыз Андерсен илакәқәа еидызкыло аҩбатәи ашәҟәы», – иазгәалҭеит аусбарҭа аиҳабы.
Акрызҵазкуа акәны иршьоит «Аԥсышәала аусеилыргара амҩаԥгаразы ахархәага» аҭыҵра. Ахархәаҩцәа ироураны иҟоуп абызшәа ззымдыруа рзы аԥсуа бызшәа арҵага шәҟәы.
«Аԥсуа бызшәа асахьатә жәар», насгьы «Ирхәмару алакәқәа» (4-10 шықәса зхыҵуа рықәра иаҵанакуа) реиқәыршәаҩ, аусбарҭа аусзуҩы Маиа Амҷба иазгәалҭеит, аԥшшәы змоу ашәҟәқәа рҭыжьра ахарџьқәа рацәаны ишацу, аха, ега ус акәзаргьы, ахәыҷқәа ирызку хымԥада иҭыжьтәу амҩа мрыҭара ишахаҵгылалатәу.
«Аԥсуа контент» зыхьӡу апроект напхгара азылуан Гәында Сақаниаԥҳа. Аиутуб-канал аҟны ахархәаҩцәа ирбо-ираҳауа еиҿкаауп аудиошәҟәқәа быжьба. Ааигәа иҳаҩуп иара убас Андерсен илакәқәа реиҭагақәа. Хымԥада, лхаҭагьы лгәы ишаанаго ала, аеуеиԥшым атекстқәа аԥсышәала ахәыҷқәа ианраҳауа даара хәарҭара алоуп. Аԥсуа диаспорақәа рзы акәзаргьы, еиҳа имариоу амҩақәа ируакуп. Араҟа акырӡа аҵанакуеит ахәыҷқәа мажәақәа рҳәашьа ииашаны иахьраҳауа, ргәынкыларагьы рзымариахоит. Даараӡа иазааԥсеит, ирыбзоуроугьы рацәоуп арежиссиорцәа Виачеслав Аблоҭиа, Алхас Марколиа.
1200 цыра еиҭаҭыжьуп Диана Шамба еиқәлыршәаз аудиошәҟәы «Иссиру ашьҭыбжьқәа». Ари аҭыжьымҭа ала ахәыҷқәа ахатәы бызшәа дырҵараҿы аҿыцрақәа алагалоуп. Араҟа аԥсышәала анбанқәа ирымадоу атестқәа ирцуп аинтерактивтә музыка.
«Макьана иҵегьы иҟаҵатәу рацәоуп. Ацхыраара ҟалар, ҳәарада, иҳалҳаршаша маҷӡам. Атехника иаманшәалоу, ибзианы издыруа аҿар адыԥхьалалатәуп, аха ара ицәырҵуеит ахарџь азҵаатәы. Уи ԥынгылара ауеит. Ега ус акәзаргьы, ҳус ҳацәхьаҵӡом», – лҳәеит уи.
Аиутуб-канал аҟны ахархәаҩцәа ируеит иара убас Баҭал Ҳагәышь аус здиулоз «Амобилтә гәлаҵа». Ари аконтент дасааԥсеит Диана Шамба. Уи ахархәарала ашколқәра иаҵанакуа ахәыҷқәа рхатәы бызшәа аҵараҿы, насгьы анбанқәа ииашаны рҳәаразы ирыцхраауеит.
Аиқәшәарахь инаԥхьаз рахьтә ргәаанагарақәа рҳәеит: Альдона Ажьиба, Анатоли Лагәлаа, Ирина Кәакәасқьыр, Манана Аршба, Риҵа Сақаниа уҳәа егьырҭгьы.
В. Баалоу
