Валери Бганба амчратә усбарҭақәа ҭабуп ҳәа реиҳәеит алхрақәа раан имҩаԥыргаз аусуразы.
«Раԥхьатәи алхрақәа мҩаԥысит ҭынч. Аха нас иаалрҟьаны аибарххарақәа цәырҵит. Зыӡбахә ҳамоу абжьы зхоу адырраҭарақәеи, анаҩс аерманцәа рхеидкыла аофициалла иҟанаҵаз аҳәамҭеи роуп.
«Аерманцәа рхеидкыла амчрақәа рыхшыҩ азырышьҭуеит аерманцәа рацәаҩны иахьынхо ақыҭақәа рхадарақәа реиҳабацәа шдыршәоз. Иҟалаз еилҳаргароуп, аибарххара ҳарцәароуп, ус анакәымха, уи иҽеим аусқәа ахылҿиаар алшоит», – иҳәеит Бганба.
Ажәалагала ҟаиҵеит аоперативтә гәыԥ аԥҵахарц.
«Сгәы иаанагоит, иаԥаҳҵароуп ҳәа аҳәынҭшәарҭадара Амаҵзуреи аҩнуҵҟатәи аусқәа Рминистрреи алархәны Апрокуратура хада анапхгарала аоперативтә гәыԥ, ҳҽазаҳшәароуп абжьы зхоу анҵамҭақәа, иара убас аҳәамҭақәа рҟны иарбоу аилыргара, абри азҵаара аганахьала ақәаԥ ҳаргыларцазы, иҟалаз аҭагылазаашьа ҳарцәарцазы», – иҳәеит Бганба.
Апрокурор хада инапынҵақәа назыгӡо Дамир Кәыҵниа иҳәеит азинхьчаратә усбарҭақәа рнапхгаҩцәа ркоординациатә еилацәажәара инақәыршәаны аҭагылазаашьа шыҭҵаатәу.
«Апрокуратура аганахьала иаҭаху аусура зегьы мҩаԥгахоит. Агәаҭаратә усмҩаԥгатәқәа зегьы, иаҭаху аҭҵаарақәа арбахоит, иагьымҩаԥгахоит», –иҳәеит иара.
Аҩнуҵҟатәи аусқәа рминистр инапынҵақәа назыгӡо Роберт Киут аҭагылазаашьа далацәажәеит.
Аминистр иажәақәа рыла, февраль 16 азы атәылауаҩ Самвел Дашьчиан ахәышәтәырҭахь днеит инылаз ахәрақәа рҭыхразы.
«Ас еиԥш аусқәа рымҩаԥгараан хымԥада иҟазароуп амилициа аусзуҩцәа. Урҭ ахәышәтәырҭахь инеит. Дашьчиан иҿахәы аниҿырхуаз иҳәеит, уи ахәрақәа шинырҵаз иара иашьцәеи ижәлантәқәеи. Макьана арзаҳал алаимҵац, аха иахьа аматериалқәа еиқәҳаршәоит, урҭ дәықәаҳҵоит аҩнуҵҟатәи аусқәа Гагратәи рраионқәа ҟәша ашҟа»,– иҳәеит аминистр инапынҵақәа назыгӡо.
Аерманцәа рхеидкыла аофициалла иҟанаҵаз аҳәамҭа акәзар, уи макьана ирмоуцт, аха, Киут ишазгәеиҭаз еиԥш, аҩнуҵҟатәи аусқәа Рминистрраҿы уи ахаҵгылара иазыхиоуп.
«Иацуха ҳусзуҩцәа иаашаанӡа аус руан. Ари аусура иацаҳҵоит. Џьара уадаҩрақәак цәырҵуазар, ҳара урҭ рҭыԥ иқәаҳҵалоит», – иҳәеит Киут.
Аҳәынҭшәарҭадара Амаҵзура ахантәаҩы инапынҵақәа назыгӡо Дмитри Қәычбериа иҳәеит аерманцәа рхеидкыла арзаҳал иахьа ашь ыжь дара рышҟа ишнеиз.
«Изыхәҭоу аҟәша аус ҭнаҵаауеит Апрокуратура хадеи аҩнуҵҟатәи аусқәа рминистрреи рҟнытә рколлегацәа алархәны. Иаҭаху аусқәа зегьы ҳадаҳкылоит. Атәылауаа рыршәара акәзар, уи аганахьала изыхәҭоу аусмҩаԥгатәқәа наҳагӡалоит», – иҳәеит иара.
Қәычбериа иазгәеиҭеит абжьқәа зтәу раарԥшра шыуадаҩу, избанзар урҭ дәықәызҵоз иажәақәа мап рцәикуеит.
Валери Бганба азинхьчаратә усбарҭақәа рнапхгаҩцәа дрыҳәеит аҭагылазаашьеи аерманцәа рхеидкыла анапхгаҩы иарзаҳали ҭырҵаарц. Уаҟа жәпакы ажәалагалақәа ҟаҵан, убрахь иналаҵаны иара иҩныҟа инеины азҵаара аӡбарагьы.
«Сара исҭахын ахеидкыла ахантәаҩы шәиазҵаарц ахада инапынҵақәа назыгӡо изҵаара иӡбарц шиҭахыз», - иҳәеит Бганба.
Уи иажәақәа рыла, аинтернет иҭоуп иара иҭаацәеи иҷкәынцәеи рыхьӡала аршәарақәа, ишакәым ацәажәарақәа зныԥшуа бжьыла адырраҭарақәа.
«Сара ишсарҳәаз еиԥш, уи Гагра инхо Геннади Анқәаб иоуп. Иаби сареи ҳаибадыруеижьҭеи акрааҵуеит, ҳаизыҟазаашьақәа бзиоуп. Уи сыҷкәынцәа рыхьӡала ажәақәак иҳәеит. Исҭахын агәаҭарақәа раан иара убас еилшәыргарц сара сыҷкәынцәа иарбан штабқәоу излоу, алхрақәа ирылахәу ирылахәыму, аӡә изы агитациа ҟарҵо иҟарымҵо».
Валери Бганба ахада иусбарҭа анапхгаҩы инапынҵақәа назыгӡо Зураб Қаџьаиа дизҵааит мызкы уажәаԥхьа ԥсшьара ицаз аусзуҩцәа, аусурахь изыхнымҳәуазеи ҳәа.
«Шәахәаԥш, аусура имныҟәо зусҭцәоу. Актәи абжьыҭараан ҳаблақәа хаҳҩеит азин рымаӡамкәа алхратә штабқәа русура ишалахәыз азы ахада иусбарҭа аусзуҩцәа. Уажәы аҩбатәи алхрақәа рахь ҳаиасит. Сгәы иаанагоит, урҭ аҳәынҭмаҵзуҩцәа рыдагьы рыдгылаҩцәа еизыргап, иаҭаху аусмҩаԥгатәқәа нарыгӡап ҳәа. Рҭыԥқәа ирхылааит, атәыла аизҳазыӷьаразы аус рулааит», – иҳәеит Бганба.
