Урҭ рылацәажәеит еиуеиԥшым акультура мшқәа, агастрольқәа рымҩаԥгара, иара убас Аиааира ду иазку аусмҩаԥгатәқәа.
Ақәҿиара ду амоуп «Хьыбла Герзмаа шәаалыԥхьоит…» ҳәа амузыкатә фестиваль. Урҭ мҩаԥысуеит Урыстәылангьы Аԥсынгьы. Гастроль ҳасабла Урыстәылаҟа инеираны иҟоуп Ф.Искандер ихьӡ зху адрама Аҳәынҭқарратә аурыс театр. Уи аҭакс Аԥсны иаҭаауеит Вахтангов ихьӡ зху атеатр.
Урыстәыла Аԥсны иацхраалоит акультура аганахьала аспециалистцәа разыҟаҵараҿы. Абарҭқәа рзы еицәажәеит Ольга Лиубимоваи Динара Смыри.
Урыстәыла акультура аминистр Ольга Лиубимова дырҭааит Аԥсны асахьаҭыхҩцәа Реидгыла ахыбреи Амилаҭтә сахьатә галереиеи. Уажәы уаҟа аҭашьақәыргыларатә усурақәа мҩаԥысуеит.
Аргыларатә усҳәарҭа ахаҭарнак Русҭам Цәеиба иажәақәа рыла, арҽеиратә усурақәа рхыркәшара азгәаҭоуп хымз-ԥшьымз рыҩнуҵҟала.
Лиубимова иара убас даҭааит И.Г.Папасқьыр ихьӡ зху Амилаҭтә библиотека. Уажәы аамҭала убраҟа иҵәахуп 2024 шықәса ианвар 21 азы иҟалаз амцакра аан еиқәхаз аҭыхымҭақәа.
Ҳазну аамҭазы абиблиотекаҿы ареставрациатә усурақәа мҩаԥысуеит, аԥсуа специалистцәа инарывагыланы аус руеит Урыстәылатәи рҩызцәагьы.
«Абылра аныҟалаз адырҩаҽныҵәҟьа адырра шәаҳҭеит, ҩымш ааҵуаны Урыстәылаҿ мацара акәымкәан, аҳәаанырцәгьы ибзианы еицырдыруа ареставраторцәа ҳзаашәышьҭит. Урҭ даара аусура ду мҩаԥыргеит, иагьеиқәдырхеит 150 раҟара аусумҭақәа», – лҳәеит Аԥсны акультура аминистр инапынҵақәа назыгӡауа Динара Смыр.
Абри инаваргыланы, абарҭ амшқәа рзы Аԥсныҟа ҩаԥхьа иааит Урыстәылантәи аспециалистцәа ргәыԥ ду. Иалырхит 60 раҟара аусумҭақәа, урҭ ареставрациазы Москваҟа иргоит.
Ольга Лиубимова иазгәалҭеит Аԥсны Амилаҭтә сахьатә галереиаҿы иҟалаз атрагедиа Урыстәылангьы ргәаҵанӡа ишнеиз.
«Урыстәылатәи амузеи дуқәа рнапхгаҩцәа, амцакра ашьҭахьҵәҟьа акультура аминистррахь аҭел иасуан, ацхырааразы амҩа ҳанбақәлои ҳәа. Ҳәарас иаҭахузеи, ари даара акраҵанакуеит. Ари еиҩызароуп, еицхыраароуп», – лҳәеит Урыстәыла акультура аминистр.
Урыстәлеи Аԥсни алацәажәоит Аҟәа ҳаамҭазтәи акинозал аартра, иара убас афильмқәа реицҭыхра. Абри атәы дазааҭгылт Ольга Лиубимова.
«Ҳаамҭазтәи акинозал аартра иалнаршон ҳаамҭазтәи акино дырбара. Ҳаԥхьаҟа, ҳәарас иаҭахузеи, иаҳҭахын акино ду аԥшӡареи, аԥсабареи, архетектуреи иргәулаку абри аҭыԥ аҿы аҭыхра. Шәааи ҳазхәыцып»,–лҳәеит лара.
Аминистр илгәалалыршәеит, Урыстәылатәи акинематографистцәа Аԥсны акино ҭырхуеижьҭе акыр шааҵуа, хымԥада, иаҳагьы еиӷьхон еицаҳзеиԥшу акино аҭыхра.
«Ҳара иаҳгәалашәоит, ҳашрыдгылоз Фазиль Искандер иубилеитә шықәсеи «Ҷик ихәыҷреи», иҟан апроектқәа. Џьара аинтерес зҵоу сценариақәак цәырҵыр, акультура Аминистрреи акино Афонди рыла ацхыраара ҟаҳҵалоит», – иазгәалҭеит аминистр.
Иара убас Аԥсны акультура аминистр инапынҵақәа назыӡо Динара Смыр длыцны, Ольга Лиубимова Ф. Искандер ихьӡ зху адрама Аҳәынҭқарратә аурыстә театр.
«Еснагь гәахәара дула ҳактиорцәагьы, ҳрежиссиорцәагьы Аԥсныҟа иаауеит. Традицианы иҟоуп, аҩызцәа ианырҭаауа аҳамҭа рнапы аркра. Иахьа асценазы иаҭаххаша амыругақәа рганахьала ақьаадшәҟәқәа шаәҳҭоит», – лҳәеит аминистр атеатр анапхгаҩы Иракли Хынҭәба даниацәажәоз. Хынҭәба ҭабуп ҳәа ахиҳәааит атеатр иарҭо ацхыраара.
Иара убас, атеатр афоие аҟны имҩаԥысит Аԥсны акультура аусзуҩцәа рԥылара. Аиԥылара иалахәыз рылацәажәеит атеатри, амузыкеи, аҿыханҵатә ҟазареи рганахьала еицырзеиԥшу апроектқәа рынагӡара. Иаҳарак хшыҩзышьҭра рызун абаҩхатәра злоу аҿар рыдгылареи акультуратә еимадарақәа реиҿкареи рызҵаарақәа.
Аԥсны акульутра усзуҩцәа Лиубимова лахь аҳәара ҟарҵеит анҭыҵҟа ирго амузеи цәыргақәҵақәа ҳазала реиқәыршәара азҵаара аҭыԥ ақәҵара мариахарц азы.
«Ҳколлегацәа–аҳазалхыҩцәа ҳрацәажәоит, аҭыԥ иқәаҳҵоит», – лҳәеит лара. Иара убас иазааҭгылт амузеитә реставраторцәагьы разыҟаҵара.
«Ари проблеман иҟоуп Аԥсни Урыстәылеи рҟны мацара акәымкәа. Адунеи зегьы рҟны уи проблеман иқәгылоуп избанзар аспециалистцәа раасҭа зеиуахкыҟаӡам аобиектқәа еиҳауп. Ари азҵаара аҳәынҭқарра анапы алакызароуп», – иазгәалҭеит аминистр.
Аиԥылараҿы ишьҭыхын аԥсуа бызшәа аиқәырхареи адгылареи ртемагьы.
Лиубимова иазгәалҭеит Урыстәыла шазхиоу абри азҵаара адгылара, хықәкыла ажәалагалақәа ҟалозар.
«Агәра ганы сыҟоуп, лҵшәа бзиала аусеицыура ҳалшап ҳәа. ажәалагалақәа еидкылатәуп. Абызшәадырра иазку ҳцентрқәа алшарамч ду рымоуп, ацхыраара иазыхиоуп», – лҳәеит лара.
Иазгәаҭан ҳаԥхьаҟа аусеицура аплангьы. Уи иамҽханакуеит еицаҳзеиԥшу акультутратә усмаҩԥгатәқәа, апрограммақәа рынагӡара, Урыстәылеи Аԥсни рыжәлақәа рыбжьара акультутратә еимадарақәеи наҟ-ааҟ аилибакаареи рырӷәӷәара иацхраауа.
Ольга Лиубимоваи Динара Смыри инаҵшьны иазгәарҭеит Аԥсны акульуратә ҭынха аиқәырхара акырӡа шаҵанакуа.
