Аекологиа Аинститут аԥсыӡтә нхамҩеи арахәааӡареи рыҟәша аспециалист хада Никита Пачалиа Аԥсныпресс аҟны ахҳәаа азыҟаиҵеит аԥсыӡкра аҭагылазаашьа. Уи иазгәеиҭеит, аквотақәа инарықәыршәаны иркыр ауеит 25 нызқь тонна. Иахьазы иркхьоу 1688 тонна ауп, ари иҳаҩсыз ашықәс иадкыланы акырӡа еиҵоуп.
Раԥхьаӡа иргыланы излацәажәо амшын аҟәандара ауп. Ҳазҭоу аӡынразы уи 10 градус еиҵамхац. Акамшьиа ҳәа изышьҭоу еидгәыԥлоит 8 градуск ианыхьшәашәалак.
Абри инаваргыланы, аԥсыӡкра амҽхак зыдҳәалоу аусадуларатә усхк алшарақәа роуп. Иарбанзаалак анаплакы иазалырхуеит аԥсыӡкразы 2-2 аӷбақәа. Аԥсыӡхәшеи аԥсыӡшылеи рҭыжьра рнапы алакуп азауадқәа 9. Дара-дара аквотақәа еиҩыршоит.
Ԥачалиа иажәақәа рыла, аекологиа Аинститут иаанагаз азгәаҭарақәа рыла акамшьиа амҽхак рацәахар акәын, аха абасҟак ҟалоит ҳәа ацифрақәа рылацәажәара ауам, аҭагылазаашьа еиӷьхап ҳәа агәыӷрақәа шыҟоугьы.
Аиқәшаҳаҭрақәа рыла аԥсыӡкра ауеит 2025 шықәса маи 1 азынӡа. Аӡтәы биологиатә ресурсқәа ахрархәаразы иаланагалахьеит 6 миллионки 400 нызқь мааҭ. Иҳаҩсыз ашықәс аан абри аамҭазы иаланагалахьан 16 миллион мааҭ.
Ҵыԥхтәи аԥсыӡкраан аиԥш, анаплакқәа тоннак акамшьиа иахыршәаауеит 2 нызқь мааҭ.