Арра анихига ашьҭахь, 1981 ш. азы дҭалеит Аԥснытәи аҳәынҭуниверситет афилологиатә факультет. Ҩышықәса анҵы, диаган М.В.Ломоносов ихьӡ зху Москватәи аҳәынҭқарратә университет ажурналистика афакультет. Далгеит 1990 шықәсазы.

Даур Инаԥшьба корреспондентс аус иуан агазеҭ «Аԥсны ҟаԥшь» аредакциаҿ. Анаҩс Аԥсуа телехәаԥшра аредакциахь дрыдыркылт. Далахәын ателепрограммақәа «Асабша», «Ахҭыс», «Ҳазҭагылоу аамҭа» разырхиара.

1992-93 шықәсқәа рзы Аԥсны жәлар Рџьынџьтәылатә еибашьраан Даур Инаԥшьба иазирхион аибашьра ахьцоз аҭыԥқәа рҟнытә ателерепортажқәа, асиужетқәа, иара убас Мрагыларатәи афронт аибашьцәа ирызкыз анҵамҭақәа.

Даур Инаԥшьба Аԥсны зҽаԥсазтәыз журналистын, арратә корреспондентын, ианашьан «Ахьӡ-Аԥша» аорден ахԥатәи аҩаӡара, амедалқәа «Агәымшәаразы», «Кәыдры ахақәиҭтәразы».