Урҭ аҭоурыхтә рыцхәқәа ирыҵыркуа ашколқәа, аиҳабыратә ҵараиурҭақәа рҟны аҿар ираҳауазароуп, ирдыруазароуп.
Иага ус иҟазаргьы, иҭахаз ирыдҳәалоу амш аан ажәлар неилароуп қыҭацыԥхьаӡеи қалақьцыԥхьаӡеи рҿы игылоу абаҟақәа рахь. Зны-зынла уцәа уҭӡыӡаауеит, абаҟа иаҭааз ауаа уанрыхәаԥшлак.
Сынтәа Гәымсҭатәи афронтаҿы иҟаз аҩбатәи ажәылара (05.01.1993 ш.) ҩажәеи жәаҩа шықәса ахыҵуеит. Усҟан ари ажәылара амҩаԥгаразы Арбџьармчқәа адҵа рыдыркылеит. Ажәылара напхгара аиҭон аполковник Дбар Сергеи Платон-иԥа. Иара ихаҭыԥаҩцәас иҟан аполковникцәа; Кьылба Муҳамеди Ҭарба Валерии. Аштаб деиҳабын Гәымба Иаков.
Абаталионқәа иалахәыз; 1-тәи абаталион акомандир Аҩӡба Владимир, 2-тәи –Берзениа Амиран, 3-тәи – Карчаа Ренат. Актәи абаталион аҟәырақәа (аротақәа) хԥа рыла ишьақәгылан; 1-тәи аҟәыра акомандир – Смыр Алик (Афонаа), 2-тәи аҟәыра – Бигәаа Рауль, 3-тәи аҟәыра – Зарданиа Русла. Иара убас актәи абаталион иадҵан аҟәырақәа ҩба; Аҩӡба Качубеии Тәанба Виктори ԥызацәас измаз.
Аҩбатәи абаталион шьақәгылан: аҟабардаа злаз агәыԥ «Ҟабарда» акомандир Ҟабарданов Гена, ихаҭыԥуаҩ Абаев Аслан. 1-тәи аҟәыра («Замастианка») Начачоглы Владимир, 2-тәи аҟәыра – Цәышба Славик, 3-тәи аҟәыра – Чукбар Галактион. Ажьырныҳәатәи ажәылара иалахәызи иҭахази иаадырԥшыз агәымшәара ахааназы хашҭра ақәымкәан иаанхоит. Ихәыз аҵаа изылымҵыз, Гәымсҭа аӡы нырцә ишьҭан. Урҭ аӷа инапаҵаҟа иаанхаз ҳаибашьцәа хьӡырҳәагақәа аиҭныԥсахра аамҭазы ишьны иҳарҭеит. Уи ахьаа ду еснагь ҳцәа-ҳжьы иалазаауеит. 36-ҩык Аԥсны аҵеицәа ари ажәылараҿы иҭахеит. Аԥсны Афырхаҵа Соснолиев, абас иҳәеит:
– Ажьырныҳәатәи, хәажәкыратәи ажәыларақәа аӡәырҩы илаҵшәадахаз жәылараны ирыԥхьаӡоит. Уи ииашаӡам. Иҳабашьуаз 44-нтә иҳаиҳан, 20-нтә артелериа ирымазала иҳаԥыргон. Хыхь иҳәоу ажәыларақәа рыҩбагь рымчала ҳаибашьцәа Аиааира цәыббрамза 30, 1993 ш. ааргеит.
Хашҭра зқәым ахҭысқәа аанхоит наӡаӡа ҳҭоурыхаҿы. Уи иацу ахьаа Афырхаҵара ишьҭнахлоит, иагәылслуеит. Ажьырныҳәатәи ажәылара Аиааира агара иацхрааз, ус анакәха, шьаҿа-шьаҿала ҳажәлар рыгәаӷьреи ргәымшәареи ҳхамышҭуазароуп ахааназы.
Абыџба Вахтанг Зосим-иԥа
Агәмаа Гарик Жосик-иԥа
Агрба Витали Кәынҵал-иԥа
Арџьениа Зураб Виктор-иԥа
Ачба Баҭал Беӡыгә-иԥа
Барганџьиа Зураб Шьоҭа-иԥа
Барцыц Игор Дырмит-иԥа
Бганба Витали Мака-иԥа
Бганба Асҭамыр (Хасик) Сергеи-иԥа
Бгьоу Гурам Константин-иԥа
Бебиа Зураб Ҷыҷыкәа-иԥа
Гәлариа Зураб Радион-иԥа
Ешба Руслан Фиодор-иԥа
Ӡкәуа Алхас Мирод-иԥа
Кобыльцев Геннади Иван-иԥа
Қәҭарба Асҭамыр Валериан-иԥа
Ладариа Борис Қьаазым-иԥа
Лакәиа Рудик Шоҭа-иԥа
Мишьелиа Сулҭан Уасил-иԥа
Ориол Михаил Михаил-иԥа
Ԥимԥиа Анатоли Виктор-иԥа
Сабекиа Заур Арсен-иԥа
Сысоев Игор Ермолаи-иԥа
Туманиан Мартирос Арсен-иԥа
Ҭраԥшь Едуард Қьаазым-иԥа
Хәытаба Алеқсандр Уасил-иԥа
Ҳаразиа Валери Иуана-иԥа
Ҳаџьымба Рудик Рамазан-иԥа
Ҳашба Алхас Џьамал-иԥа
Ҵәыџь Алик Иуана-иԥа
Чыкәбар Валери Александр-иԥа
Чыкәбар Галақтион Дмитри-иԥа
Ҷанба Борис Харитон-иԥа
Ҷанба Олег Евгени-иԥа
Џьопуа Нодар Роф-иԥа
Џьынџьал Андреи Сулико-иԥа
