Мышқәак раԥхьа, аинформациаҟны ишазгәасҭахьаз еиԥш, раԥхьаӡакәны еиҿкааз афестиваль "Мандарин" аартын ажьырныҳәа 3 Аԥснытәи аетнографиатә парк аҟны.

Афестиваль аартраҿы, уи адиректор Светлана Габуниа иҭабуп ҳәа ралҳәеит зҽалазырхәыз зегьы. Иазгәалҭеит, ари афестиваль аԥсуа ҵасқәа иршьагәыҭны ишыҟало.

Араҟа хымш имҩаԥысуа афестиваль аҟны имҩаԥгахоит еиуеиҧшым аусмҩаԥгатәқәа: Аԥсны аалыҵ маҷқәа рхәаахәҭра, анапҟазара аусумҭақәа рцәыргақәҵа, Аԥсны аҩқәа ргьама абара, асахьаҭыхҩцәа рҭыхымҭақәа рцәыргақәҵа, ансамбль "Гәында" рашәақәа рынагӡара, аконцерт, амандарин ҵлақәа реиҭаҳара, анапҟазареи аҿыханҵеи рмастер - классқәа, ашар кәымпылқәа аҳауахь рышьҭра.

Афестиваль "Мандарин" мҩаԥыслоит ажьырныҳәа 8 - нӡа. Уи иамҽханакуеит Аԥсны араионқәа. Убас, афестиваль аныҳәатә усмҩаԥгатәқәа иацҵахоит асасааирҭа "Абхазия", иара убас асовнхара "София", аплиаж " Морнеро".

Афестиваль "Мандарин" аинформациатә лахәылас иамоуп амедиагәыԥ "Апснымедиа".