Иҳаҩсыз амшқәа рзы ақалақьқәа Гагра, Пицунда, аҳаблақәа Бзыԥи, Цандрыԥшьи рҟны имҩаԥысит аԥсаӡ аартра иазкыз аусмҩаԥгатәқәа.
Ԥхынҷкәынмза 25 азы Гагра аиааира ашҭа аҟны игылоу аԥсаӡ хада аартра иазкыз аныҳәа мҩаԥган. Ахәыҷқәа зегьы ргәы хыҭ-хыҭуа иазыԥшын мцарацәала ирхиаз аԥсаӡ хада арлашара аамҭа.
Ашколхәыҷқәа аҳамҭақәа ранашьан, ақалақь ахадара заанаҵ хәыда-ԥсада ирырҭахьаз алататереиатә билеҭқәа рыхәмаррла.
Зынӡа ахәыҷқәа рзы еиҿкаан 1500 цыра рҟынӡа аҳамҭақәа. Агәаҳәара змаз зегьы ирыман алшара асцена хадаҟны ажәеинраалақәа рыԥхьара. Иара убасгьы ԥхынҷкәынмза 26 асааҭ 12:00 рзы имҩаԥган асахьаҭыхратә цәыргақәҵа, асааҭ 16:00 рзы ирлахҿыхгоу ахәыҷтәы программа еиҿкаан.
Ԥхынҷкәынмза 25 азы аԥсаӡ хада аартын Пицундагьы. Ақалақь ахадара еиҿнакааит ирлахҿыхгоу апрограмма. Аҭыԥантәи анхацәа ааԥхьара рыман ақалақь агәҭаны игылоу аԥсаӡ ашҟа, урҭ зегьы ргәалаҟазаара шьҭырхуан еиуеиԥшым аперсонажцәа.
Анаҩс, ԥхынҷкәынмза 27 азы аҳабла Бзыԥ администрациа ахыбраҿы еиҿкаан аконцерттә программа. Уаҟа рхы аладырхәит ашәаҳәаҩцәа Инесса Григолиа, Хатуна Ҭарба, Викториа Амҷба, иара убас акәашаратә ансамбль "Бзыԥ". Ахәыҷбаҳчақәа "Асԥа", "Бзыԥ" рааӡамҭацәа инырыгӡон ашәақәеи акәашаратә номерқәеи.
Аныҳәа хыркәшан ахәыҷқәа аҳамҭақәа ранашьареи, аныҳәатә феиерверкқәеи рыла.
Аҳабла Цандрыԥшь асасцәеи аҭыԥантәи ауааԥсыреи ԥхынҷкәынмза 28 рзы акыр иззыԥшыз Ашықәс ҿыц ныҳәа азгәарҭеит.
Еизаз зегьы дрыдныҳәало, Гагра араион ахадареи, аныҳәа аиҿкаара аҟны зхы алазырхәызи зегьы иҭабуп ҳәа реиҳәеит аамҭала Цандрыԥшь аҳабла ахада иусқәа назыгӡо Едгар Аслан-иԥа Быҭәба.
Сынтәатәи ашықәс азы Гагра араион ахалара абзоурала 856-ҩык ахәыҷқәа араион иаҵанакуа ахәыҷбаҳчақәа рышҟа иныҟәо зегьы аҳамҭақәа роуит. Иара убас аҳамҭақәа ранашьан актәи акласс ахь иныҟәо ахәыҷқәа. Аҳамҭақәа рыҭан араион ахәыҷбаҳчақәа рааӡамҭацәа зегьы.
Насгьы ҳамҭада иаанырмыжьит ареабилитациатә центр "Мы вместе" зхылаԥшуа ахәыҷқәагьы.

Аманда Анталаа