Ааи, убас акәхап еиҵагыло абиԥарақәагьы абжьаратә ҵара хыркәшаны, аԥсҭазаараҿы излахырҳагахаша рдыррақәа рырҵаулареи, рыуаҩратә хаҭара агәылыршәареи иазынархоу раамҭагьы шымҩаԥысуа. Баша иаҳәом ажәлар рҟәышра «абла иабо ахы иаԥсоуп» ҳәа. Ҳазну аҵарашықәсбжа аҩбатәи азбжазы Аԥснытәи астудентцәа рхы рыладырхәит акымкәа ҳтәыла анҭыҵ имҩаԥысуаз жәларбжьаратәи аусмҩаԥгатәқәа.
Ноиабр 17 инаркны 23-нӡа Руслан Амҷба, Милана Хонӡиа, Арина Чагәаа, Иалса Зыхәба, Саида Аҩӡба рыла ишьақәгылаз астуденттә делегациа алахәын Москва ақалақьаҿы имҩаԥысуаз «Объединяя студенчесто» ҳәа хьӡыс измаз, астуденттъ халанапхгараҭара жәларбжьаратәи афоруми,астуденттә гәыԥқәа Урыстәылазегьтәи реизара дуи. Иара убас, Саиаҭ Сабекиеи Салима Ақаҩбеи алахәын ноиабр 27-29 рзы Москва имҩаԥысуаз «Аҿар адунеизегьтәи рфестиваль аушьҭымҭацәа Рконгресс» зыхьӡыз зымҽхак акырӡа иҭбааз аусмҩаԥгатә.
Декабр 3 рзы Москва аҳаблақәа руак иаҵанакуа Солнечногорск ақалақь аҿы, анапхгараҭаратә ҟазарҭа «Сенеж» аҟны имҩаԥысит Урыстәыла аҵара зҵо аҳәаанырцәтәи астудентцәа еидызкылоз асеминар «Молодежь будущего: работа с сообществом в разных странах» атема ала. Аԥсны иахаҭарнакцәаны уи иалахәын Анас Ладариеи Серафима Лакобеи.
Ҳ́арада, арҭ аизара дуқәа иззынархаз аҿарацәа рҵаратә ԥсҭазаараҿеиԥш, есымшатәи рыбзазараҿгьы акыр иԥышәарҳаганы иҟалеит. Уаҟа ирзааҭгылан акультурабжьаратә коммуникациақәеи, адипломатиеи, жәларбжьаратәи аимадарақәа рырҵаулареи рзы азҵаарақәа жәпакы. Еиуеиԥшым аҳәынҭқаррақәа иеиҳау рҵараиурҭақәа ирхаҭарнакцәоу рықәлацәеи, Аԥснытәи ахьыбҿари реибадырра, анаҩстәи реиҩызареи русеицуреи рзы акыр аҵанакуеит. Ирацәоуп урҭ ирбаз, ираҳаз, ишьҭыркааз аҭыԥан ахархәара зуҭаша, аԥсҭазаараҿы ихымԥадатәны аларҵәара зауша аԥшьгамҭақәа.
Убасгьы, ааигәа Аҟәатәи аҳәынҭқарратә коллеџь ахыбраҟны, Аԥсны аҵара аминистрра аԥшьгарала имҩаԥысит, уаҵәы истудентхараны иҟоу, иахьа ҳтәыла абжьаратә школқәа рҟны аҵара зҵо, ҳазну аҵарашықәсбжа иалагӡаны Аԥсны анҭыҵ еиуеиԥшым жәларбжьаратәи аиндаҭларақәеи аолимпиадақәеи рҟны аԥхьахәгара зҽаԥсазтәыз ашколхәыҷқәа рыдныҳәалара иазкыз агәырӷьаратә усмҩаԥгатә.
Уахь инаԥхьаз иреиуоуп: аинспекторцәа қәыԥшцәа рҳәынҭқаррабжьаратә еизара ду иалахәыз Сандро Соломко, Дамир Кишмариа, Сариа Ҭарба; Урыстәылазегьтәи ахәыҷтәы центр «Смена» аҟны имҩаԥысуаз аурыс бызшәеи акультуреи Жәларбжьаратәи афестиваль аҿы Аԥсны иахаҭарнакцәаз, еихьӡара ҳаракыла зхы аазырԥшыз – Адам Дбар, Данил Малакиан, Давид Чачхалиа, Анна Кәарҷиа, Анна Лацәышба. Ари аиԥылара иалахәын убасгьы Урыстәылатәи ателехәаԥшратә аолимпиада «Умницы умники» аҭыхрақәа ирылахәыз, адырра ҵаулараҿы ақәҿиарақәагьы аазырԥшыз – Нестор Ҭарба, Екатерина Џьынџьолиа, Сиена Лашәриа.
Аԥсны аҵара аминистр инапынҵақәа назыгӡо Габлиа Инал ашколхәыҷқәа дрыдныҳәалеит ажәа ԥхала ирзеӷьеишьеит аԥхьаҟагьы ақәҿиарақәа. Ашколхәыҷқәа ракәзар, аиԥылара алахәцәа ирзеиҭарҳәеит излахәыз аусмҩаԥгатәқәа ирызцәырыргаз ахәыцрақәеи, агәалашәарақәеи, ирзааҭгылеит анаҩстәи рыгәҭакқәа.
А.Амзацба
