Аилацәажәара иалахәын Аԥыза-министр ихаҭыԥуаҩ, афинансқәа рминистр Владимир Делба, Аԥыза-министр ихаҭыԥуаҩ, аекономика аминистр Кристина Озган, Аԥсны иҟоу Урыстәыла ацҳаражәҳәаҩ Михаил Шургалин, Аԥсны иҟоу Урыстәыла ахәаахәҭратә хаҭарнак Зарина Кобесова.
Урыстәылатәи аделегациа иалоуп аекономикатә рҿиареи аенергетикеи Рминистррақәа рхаҭарнакцәа.
Аганқәа рылацәажәеит Аԥсны аҳәынҭқарратә усбарҭақәеи, Урыстәылатәи Афедерациа аекономикатә рҿиара Аминистрреи, аҳәынҭқарратә усҳәарҭа «Краснодаркраигосекспертизеи» русеицура Арегламент аиҭакрақәа ралагалара иамадоу азҵаарақәа. Уи рызкуп Аԥсны асоциал-економикатә рҿиаразы Аинвестициатә программақәа инарымаданы идыргылауа аобиектқәа рыхәԥса ахьынӡаиашоу агәаҭара.
Иазыӡырҩын аинформациа: Аԥсны Аҳәынҭқарреи Урыстәылатәи Афедерациеи рыбжьара авиаеимадара аиҭашьақәыргылара апроект ианагӡашьоу азы; 2022-2025 шықәсқәа рзы Аԥсны асоциал-економикатә рҿиара Аҳәынҭқарратә программа анагӡара азҵаарақәа рганахьала асоциал-економикатә усеицуразы Аиҳабырабжьаратә комиссиа ацхантәаҩцәа рықәҵарала ирыдыркылаз анапынҵақәа ирынагӡашьоу.
Аилацәажәара иалахәыз рзааҭгылеит: Урыстәылатәи Афедерациеи Аԥсни рыбжьара азеиԥш социалтә, аекономикатә қәыԥшылара ашьақәыргылара Апрограмма анагӡара амҩаԥысшьа; асоциал-економикатә рҿиара ахықәкқәа рзы, убрахь иналаҵаны аидгылареи стратегиала аиҩызареи рзы Урыстәылатәи Афедерациеи Аԥсны Аҳәынҭқарреи рыбжьара Аиқәышаҳаҭра арҿиара иазкны ирыбжьарҵахьоу аиқәышаҳаҭрақәа рынагӡаразы 2024 шықәсазы афинанстә цхыраара азҵаарақәа; абиуџьеттә инвестициақәа рынагӡаразы, аинвестициатә усура адгыларазы 2024 шықәсазы афинанстә цхыраара.