Аҭыԥантәи акоманда иацхәмарырц арахь иааит Воронежтәи «Кристалил– Черкизово», Чечентәылатәи «Грозный», «Маиҟәаԥтәи «Динамо – МГТУ».
«Аԥсни» Воронежтәи акомандеи реиԥылараҿы 3:1 ҳәа аԥшәмацәа иаԥыргеит, иара убас 3:0 ҳәа аԥшәмацәа аԥыжәара ааныркылеит Чечентәылатәи анапылампыласҩцәеи дареи реиԥылараҿгьы. Аха, Маиҟәаԥтәи ахәмарцәеи дареи даараӡа еидшыланы рыхәмарра шымҩаԥысуазгьы, 3:2 ҳәа аедыгьақәа аиааира ааныркылеит.
Ачемпионат актәи аикәшара алҵшәақәа рыла аклуб «Аԥсны» 7 кәаталак аманы аҩбатәи аҭыԥ ааннакылоит. Анаҩстәи аикәшаразтәи ахәмаррақәа мҩаԥысуеит октиабр 25-27 рзы, Краснодар ақалақь аҟны.
Анапылампылтә клуб «Аԥсны» иҳаҩсыз ашықәс азгьы ари ачемпионат аҟны иқәгылон.

А. Амзацба