Рашәарамза 22 азы 50 шықәса рхыҵра азгәарҭеит раԥхьаӡатәи Урыстәыла ачемпионат актәи адивизион аҟны ҩынтәны аиааира згахьоу, Урыстәыла аспорт азҟаза, ашьапылампыл асразы Аԥсны зҽаԥсазтәыз азыҟаҵаҩ, «Ахьӡ-Аԥша» аорден III аҩаӡара занашьоу, Маиҟәаԥтәи ашьапылампылтә команда «Дружба» азыҟаҵаҩ хада Беслан Алықьса-иԥа Аџьынџьал. Иара убас раԥхьаӡатәи апрофессионалтә шьапылампылтә лигеи раԥхьаӡатәи адивизиони рҟны аиааира згахьаз, Урыстәыла ачемпионат аҟны аџьазтә медали ирыԥсахахьоу, Урыстәыла аспорт азҟаза, Урыстәыла ахраҿеи, «Ахьӡ-Аԥша» аорден III аҩаӡара занашьоу Руслан Алықьса-иԥа Аџьынџьал.
Беслани Руслани рлагала рацәоуп аԥсуа шьапылампыл арҿиараҿы. Аԥсны ашьапылампыл асразы азҟазацәа дуқәа инарываҟәыло иҟоуп даргьы, урҭ рыхьӡ ашьапылампыл аҭоурых аҟны наӡаӡа иаанхоит.
Руслани Беслани ашьапылампыл ду ахь рымҩа ианылеит 1991 шықәсазы Аҟәатәи «Динамо» ала.
Уи Асовет Еидгыла ачемпионат ахь раԥхьаӡа акәны ицәырҵит 1989 шықәсазы. Аха хара имгакәа акоманда еиҩшан. Ашьапылампыл асцәа милаҭла иақырҭқәази зыҟаҵаҩыс ирымази агәыԥ аанрыжьит.
Зыҟаҵаҩыс дарҭеит Олег Долматов, Москватәи акоманда «Динамо – 2» аҟнытә. Зыхьӡ наҩхьаз акоманда ашҟа ааԥхьара роуит 16 шықәса ирҭагылаз аишьцәа Руслани Беслани.
1992 шықәсазы Асовет Еидгыла анеилаҳа ашьапылампыл афедерациа ирыӡбеит ачемпионат мҩаԥыргарц ихьыԥшым аҳәынҭқаррақәа рыбжьара. Уахь иаҵанакит Аҟәатәи «Динамогьы». Москватәи агәыԥқәа уи аицлабра алахәра мап ацәыркит, убри аҟынтә изымҩаԥгамхеит. Аишьцәа аарыԥхьеит анаҩстәи ашьапылампыл ду ахь рымаҩа ахьалагаз Маиҟәаԥтәи акоманда «Дружба» ашҟа.
1994 шықәсазы Руслани Беслани ааԥхьара рырҭоит Калининградтәи «Балтикахь», уаҟа дара иреиӷьу хәмарҩцәахеит.
Беслани Руслани ашьапылампыл асра иҿыцӡоу аҭоурых аҟны иреиӷьу ахәмарыҩцәа иреиуоуп.
2001 шықәсанӡа Руслани Беслани Џьынџьалаа еицыхәмаруан акомандақәа Маиҟәаԥтәи «Дружба», Калининградтәи «Балтика», Москватәи «Торпедо –ЗИЛ» рҟны. Анаҩс ашьапылампыл асраҿы урҭ рымҩақәа хаз-хазхеит.
Аишьцәа ашьапылампыл асра хдыркәшеит: Руслан – 2015 шықәсазы, Беслан уи иаԥхьа ҩышықәса – 2013 шықәсазы.
2016 шықәсазы ашьапылампыл азы ConiFa аверсиа ала адунеизегьтәи ачемпионат аҟны аиааира згаз Аԥснытәи еизгоу акоманда «Динамо» азыҟаҵаҩ хада ицхырааҩыс даман. Иара инапхгарала Арцах имҩаԥысуаз Европа ConiFa ачемпонат аҟны агәыԥ иаанакылеит 3 аҭыԥ. 2017 шықәса инаркны Аԥснытәи еизгоу агәыԥ зыҟаҵаҩ хадас дыҟоуп.
Ирзеиӷьаҳшьоит аишьцәа Џьынџьалаа аманшәалара, ашықәс рацәа агәабзиара ацны.
Аманда Анталаа
