Фазиль Искандер ихьӡ зху аурыс драматә театр анапхгаҩы Иракли Хынҭәба имҩаԥигеит апресс-конференциа. Уи иалахәын амассатә информациа ахархәагақәа рмаҵзуҩц́әа, адраматә театр актиорцәа.
Апресс-конференциаҿ Иракли Хынҭәба дырзааҭгылеит 2023 шықәсазы ртеатр аусура, ашықәс иалагӡаны иқәдыргылаз акымкәа-ҩбамкәа аспектакльқәа, урҭ ахәаԥшцәа ишрыдыркылаз, иара убас Аԥсны анҭыҵ атеатр имҩаԥнагаз агастрольқәа рылҵшәа. Абри ашықәс иалагӡаны Фазиль Искандер ихьӡ зху адраматә театр ихәмарит 270 спектакль. Ари даара ихҭыс бзиоуп.
«Уаанӡа аԥсшьацәа аныҟаз акәын ахәаԥшцәа рацәаны ианҳамаз, аха иџьоушьаша, сынтәа февраль, март рзынгьты ҳзал ҭәуп ахәаԥшцәа рыла. Сара иџьасшьоит ҳашколхәыҷқәа шаҟа гәахәарыла ирыхәаԥшуа ҳаспектакльқәа «Стеклянный зверинец», «Евгени Онегин», рықәгылараан иубарҭан ҳактиорцәа реихьӡарақәа, рыҳаракыра.
Ҳара ҳактиорцәа ҿарацәа хәышықәса роуп иҵуа асценаҿ ихәмаруеижьҭеи, иҳәеит анапхгаҩы. Атеатр ашықәс иалагӡаны 12 гастроль мҩаԥыргеит. Москва иқәгылеит, иҟан Санкт-Петербург, Воронеж, Архангельск, Алтаи, Шәача – (Красная поляна), Новокузнецк. Ахәыҷтәы студиа «Чик» акәзар, Санкт-Петербург иҟан (анапхгаҩы Џьамбул Жорданиа).
Арахь Аԥсныҟа иаауеит хыԥхьаӡара рацәала Урыстәылантәи ауаа. Урҭ рахьтә ҳтеатр аҩналара иазгәышьуа рацәаҩуп.
Сынтәа атеатр атруппахь ирыдыркылеит еиҭа ҩыџьа актиорцәа ҿарацәа – Леон Ӷәынџьиа, Лана Гергиа. «Ҳара иазгәаҳҭеит актриса Наталиа Папасқьыр лиубилеи, еиӷьу иарбан иҟоу актриса лхаҭа асценаҿ дцәырҵны лҟазара ҳаракы аныдлырбо.
Уажәы ҳрепертуар аҿы иҳамоуп 30 раҟара аспектакльқәа, урҭ зегь рафишақәа ҳашьҭаҵарҭа иакӡом, иашала иаҳҳәозар, уи ҳамаӡам, убри азын акыр ацхыраара ду ҳнаҭоит аԥсуа драматә театр, Алхас Ҷолокәуа напхгара зиҭо. Ҳара аԥсуа театри аурыс театри аиҿцаара ҳамоуп».
Иажәа иацҵо иҳәеит: «ГИТИС иҭалеит ҳҿар, аректор Григори Заславски еснагь азҿлымҳара ҳзыҟаиҵоит, убриазы иҭабуп ҳәа иасҳәоит». Владимир Путин идҵала аурыс театрқәа, Урыстәыла акультура аминистр Ольга Лиубимова илыбзоураны ҳтеатр финансла ацхыраара аиуит, лашаралеи бжьылеи реиқәыршәаразы ҽаԥарак ҟаҳҵеит. Сынтәа аурыс театр иқәнаргылараны иҟоуп аурыс классика иалху аспектакльқәа.
Апрель мзазы Москва иқәдыргыларан иҟоуп аспектакльқәа фба.
«Ацынҵәарах» – ари аспектакль аурыс хәаԥшҩы даара бзиа ибахьеит. «Метод» – апрель 7 рзы, «Красавец мужчина», аспектакль «Софичка» – Фазиль Искандер ииубилеи аҳаҭыраз.
Иазгәаҭатәуп, Москва инхо аԥсуа диаспора реиҿкаарала апрель 10 рзы ишымҩаԥысуа аиубилеитә хәылԥазы, уаҟа хымԥада иалахәхоит Иракли Хынҭәба напхгара зиҭо аурыс драматә театр, Фазиль Искандер ихьӡ зху. Уи ашьҭахь атеатр цараны иҟоуп Новосибирск, Омск, нас Сахалин, инеиԥынкыланы хымз – апрель, маи, ииун агастрольқәа рымазаауеит.
Абасала, рырҿиаратә планқәа амассатә информациа ахархәагақәа русзуҩцәа ирыцеиҩишеит Иракли Хынҭәба. Ҳара ҳахәҭаахьала ирзеиӷьаҳшьоит ақәҿиара дуқәа Аԥсны ахьӡ ҭызго ҳактиорцәа ҿарацәа.

Наира Сабекиа