Аҩарҵәи абна аҵа аҵиааи амца ркит Гагреи, Гәдоуҭеи, Гәылрыҧшьи, Очамчыреи, Гали рраионқәа рҿы. Иара убасгьы аҧсабаратә амцакрақәа аҭыҧ рыман, Џьырхәеи, Аӡҩыбжьеи, Маркәылеи, Мықәи, Шьашьикәареи, Лашькьындари ақыҭақәа рҿы.
Еиҳаркгьы амцакрақәа зхылҿиаауа ауааа роуп. Ауааҧсыра рхатә гәаҧхарала, хылаҧшрада амца ддыркуеит аҳаскьыни амаҕреи зхыҵәаз адәҳәыҧшқәа. Амца аҽанеибанарклакь абнақәа рахь ииасуеит. Ауааҧсыра аҧырхага рмоурц азы аҭагылазаашьа ҷыдақәа рзы Аминистрра иааиҧмырҟьаӡакәа ахылаҧшреи аусурақәеи мҩаҧнагоит.