«Ари амеморандум аҿы ҳара аинформациатә усеицуразы ҳаиқәшаҳаҭхеит, ахәҭакахьала, Аԥсны Аҳәынҭқарреи Урыстәылатәи Афедерациеи аҩныҵҟатәи жәларбжьаратәи аԥсҭазаарааҿы аинтерес зҵоу ахҭысқәа  рзы адырраҭарақәа рыҟаҵара аганахьала», -  иазгәеиҭеит  Роберт Џьопуа.

Аԥсны – ашәышықәсақәа иргәыларсу аҭоурых змоу атәыла ауп, – инаҵшьны иазгәеиҭеит Сергеи Деменски.

 «Амедиа лшарамчқәа русеицура –  ари аекономикатә, ауаажәларра-политикатә, аҵарадырратә уҳәа Аԥсны аусхкқәа рҿы имҩаԥысуа ахҭысқәа рзы аԥхьаҩцәа ҳаамҭазтәи аҭагылазаашьа  рыдгалара, иара убас, уи атәыла  акультуратә ҷыдарақәеи атрадициақәеи рзы аудиториа адыррақәа рырҭбааразы алшара шьахәны иҟоуп», –  иҳәеит Сергеи Деменски. 

 Амедиагуԥқәа русеицура ашьақәыргылараҿы адгылара ҟаиҵеит Евразиатәи аекономикатә комиссиа аусацуразы Аԥсны адәныҟатәи аусқәа Рминистрра аҷыдалкаатә хаҭарнак Вахтанг Ԥиԥиа.

Акционертә Еилазаара «Евразийская медиа группа» аԥҵан 2001 шықәсазы. Уи аилазаараҿы иҟоуп аинформациа-аналитикатә портал «Евразия сегодня», иара убас аинтернет-ҭыжьымҭа «За рубежом». Иара аиҳарак аусура ахырхарҭа хаданы иҟоуп аекономика, анаука, аҟазара, акультура, аспорт уҳәа аусхкқәа рҿы акыр зҵазкуа жәларбжьаратәи ахҭысқәеи  Азиа-Аокеанҭынчтәи аекономикатә усеицура (АТЭС), Алада-Мрагыларатәи Азиа  аҳәынҭқаррақәа Рассоциациа (СЕАН), жә-ҳәынҭқаррак реидгыла жәларбжьаратәи аиҿкаара (БРИКС), Шанхаитәи аусеицуратә еиҿкаара (ШОС), Евразиатәи аекономикатә Еидгыла (ЕАЭС) иалоу атәылақәа рҿы имҩаԥысуа, актуалра злоу апроцессқәа рзы ажәабжьқәа рыларҵәара.