Азныказы, ахәаԥшцәа рыԥсы ӡаны актиорцәа рықәгылареи урҭ рдиалоги иазыӡырыҩуази рыла азал лыхҿыххеит, ахәаԥшцәа ргәалаҟазаара еиҳа-­еиҳа ишьҭыҵуа, лассы-лассы рыччабжь азал иҩныҩуан.
Акомедиа «Аԥеиҳаб» аус адуларазы иааԥхьаз Урыстәылатәи арежиссиор Н. Николаева мызки бжаки аус здылулоз апремиера қәҿиарала имҩаԥысит, ахәаԥшцәа ибзианы ирыдыркылеит. Акомедиаҿы амц аҭыԥ шамоугьы, абзиабареи агәыбылреи аԥыжәара ргоит.
Акомедиаҿы иаарԥшу аҭаацәара аҟны уаҩы ибарҭоуп, аҳәоуеиқәымшәареи аилибамкаареи реиԥш, аихӡыӡаареи агәыбылреи. Аспектакль аҟны мыцҳәарыла ахыԥхьакырҭа зҭаххаз астудент Бусыгини уи иҩыза Сильвеи аҵыхәтәаны рымц ааԥшуеит. Аха, амц аҳра ауанаҵы зхы ыҵызхыз агәыбылреи абзиабареи аиааира ргеит. Зҩыза иҵыхәала ԥеиҳабс зхы ҟазҵаз астудент Бусыгини уи «иаҳәшьахаз» Нинеи абзиабара рыбжьалеит. Аб Сарафанов иакәзар, ихатә хшара иеиԥшҵәҟьа бзиа диамхабеит, игәрагьы игеит астудент Бусыгин. Ажәакала, аспектакль аҵыхәтәа бзиахеит, амц аҵыхәа ԥҵәеит, аҭаацәа ҭышәынтәалеит.
Ари апремиера аҟны арольқәа нарыгӡоит 7–ҩык актиорцәа: Сарафанов – Аԥсны зҽаԥсазтәыз артист Аслан Анқәаб, Бусигин – Ахра Кәарҷиа, Сильва – Вадим Абыхәба, Кудимов – Мдар Сақаниа, Нина – Есма Шуген, Макарскаиа – Диана Абыхәба, Васенка – Леон Барчан.
«Аԥеиҳаб» аԥсшәахь еиҭеигеит апоет Геннади Аламиа, асахьаҭыхҩы–анагӡаҩыс дыҟоуп Гарри Дочиа.

Алиса Гәажә-ԥҳа