Араион анапхгаҩ ҿыц ддырдыруа, Ахада иҳәеит: «Араион аиҳабы Баграт Боџьгәуа даҽа усурак ахь диагахоит. Ахада Иусԥҟала араион ахада инапынҵақәа рынагӡаҩыс дҟаҵоуп Рауль Лолуа. Ари иаанагаӡом Баграт Боџьгәуа аус изымуит ҳәа. Абраҟа итәоу ижәдыруеит араион аҭагылазаашьа, уи ишыҟаз аасҭа еиӷьхеит. Иааугар ауеит абиуџьет алагалақәа, урҭ зеиԥшраз, уажәы ишыҟалаз. Ҳҿаԥхьа ишьҭоуп аусура ду. Иҟаҵоу маҷым, аха иҟаҵатәу еиҳагьы еиҳауп. Абарҭ азҵаарақәа зегьы аамҭа-аамҭала рҭыԥ иқәаҳҵоит».
Бжьаниа Баграт Боџьгәуа иусуразы ҭабуп ҳәа иеиҳәеит, ақәҿиарақәа изеиӷьаишьеит аҭыԥ ҿыц аҟны.
Аҳәынҭқарра Ахада иара убас араион анапхгаҩ ҿыц Рауль Лолуа ақәҿиара дуқәа изеиӷьаишьеит.
Ахада Иусбарҭа Анапхгаҩы Абесалом Кәарҷиа даԥхьеит Рауль Лолуа Гәдоуҭа араион Ахадара аиҳабы инапынҵақәа рынагӡаҩыс иҟаҵаразы Ахада Иусԥҟа.
Баграт Боџьгәуа аколлективи араион активи ҭабуп ҳәа реиҳәеит русеицуразы.
Рауль Лолуа иара иганахьала Баграт Боџьгәуа ҭабуп ҳәа иеиҳәеит, иагьазгәеиҭеит иара ихациркыз аусура ишацҵахауа. Лолуа дшақәгәыӷуа азгәеиҭеит аколлективи араион ауааԥсыреи рҟнытәи адгылара.
«Сара сҽазысшәоит Гәдоуҭа араион ишәҭыкакҷуа, араҟа шәарҭара ыҟамкәа, зегь рыла иманшәаланы аҟаҵара. Раԥхьаӡа иргыланы иҟасҵараны сгәы иҭоу, – ари Гәдоуҭа ақалақь ахь анхара аиасра ауп», – иҳәеит Рауль Лолуа.