Акыр иаԥсоу Екатерина Гьаргь-иҧҳа Бебиаԥҳа, агазеҭ "Аԥсны" аусзуҩцәа ҳахьӡала гәык-ԥсыкала ишәыдаҳныҳәалоит шәымшира
. Аԥсҭазаараҿы, аҵара-ааӡаратәи ауаажәларратәи усураҿы, арҿиараҿы аихьӡара шьахәқәа ааазырԥшуа ажурналист, ашәҟәыҩҩы, апрофессор уажәынахысгьы еиҳау ақәҿиарақәа шәзыԥшызааит, шәыгәҭакқәа шәрыхьӡалааит.
Шәызну ашьхацамҩа аԥынгылақәа аҟәгазааит, есааира аҳаракырахь шәымҩа хазааит, агәабзиареи, агәамчи, аԥсуа иқәра наӡеи шәыгымзааит, арҿиара агәацԥыҳәара шәыцзааит, ашәҟәы ҿыцқәа рыла еснагь аԥхьаҩцәа шәыргәырӷьалааит.

