«Ари ахҭыс баша еиԥыларам, ари шьаҿа ӷәӷәоуп Аԥсны шәҭыкакаҷуа, иҿиауа, аусеицура иазыхиоу ҳәынҭқарраны ашьақәыргылараҿы», – иҳәеит Аҳәынҭқарра Ахада Бадра Гәынба Жәларбжьаратәи аекономикатә форум «Аԥсны уаҵәтәи амш ахь аинвестициақәа» аартраан.
«Аоптимизм ду узцәырнагоит ас еиԥш алахәылацәа дахьқәа рыҟазаара – ҳара исасны иаҳҭоуп ақәҿиара ду змоу абизнесуаа, аекспертцәа, аҳәынҭқарратә структурақәа рхаҭарнакцәа, аинвесторцәа.
Аԥсны аԥсабара акы иалаҩашьом, ибеиоуп акультуратә ҭынхеи. Ара хаҳәцыԥхьаӡа аҭоурых ҵәахуп, проекцыԥхьаӡа ԥхьаҟатәи аԥеиԥш аанартуеит. Атәыла аекономикатә лшара ду макьана инагӡаны иаартым. Ауаа ргәалаҟазаара аҽаԥсахуеит, еилыркаауеит ҳхатәы мчқәа рыла иҳалшо шырацәо», – иҳәеит атәыла ахада.
Афорум хықәкыс иамоуп арҭ алшарақәа раарԥшра, аиҿцәажәаразы аҭыԥқәа раԥҵара, ԥхьаҟатәи еицырзеиԥшу апроектқәеи аԥшьгарақәеи уасхырс иззыҟало аимадарақәа рышьақәыргылара.
Афорум аҳәаақәа ирҭагӡаны иазԥхьагәаҭоуп аиҳабырабжьаратә еиқәшаҳаҭрақәа 3, аусбарҭабжьаратә еиқәшаҳаҭрақәа 1, аиҳабырабжьаратәи аусбарҭабжьаратәи меморандумқәа 15, анаплакқәа рыбжьара аиқәшаҳаҭрақәа 19 рнапаҵаҩра.
«Ас еиԥш аамҭа кьаҿк иалагӡаны аиқәшаҳаҭрақәа Аԥсны ахьыԥшымра азхарҵеижьҭеи ирыбжьарымҵацызт», – ҳәа гәахәарыла иазгәеиҭеит атәыла ахада.
Аԥсны Аҳәынҭқарратә биуџьет аструктураҿы ахатәы хашәалахәқәа рыхәҭа 60% еиҳахеит.
«Хадаратәла ахашәалахәқәа реизҳара зыбзоуроу афинанстә дисциплина арӷәӷәареи, ахашәалахәқәа реизгаразы аусура ацклаԥшреи роуп», - ҳәа азгәеиҭеит Гәынба.
Ареспубликатә биуџьет ахарџьқәа реизҳара азгәаҭан абарҭ ахырхарҭақәа рҿы: амилаҭтә економика (+42,5%), абаҩрҵәыра, аспорт, аҿартә политика (+39,4%), агәабзиарахьчара (+32,1%) уҳәа егь.
Ареспубликатә биуџьет аҟынтәи 2025 ш. аусбарҭатә хықәкытә программақәеи (17),аусмҩаԥгатәқәеи (11)рзы иазоужьын 2,7 млрд мааҭ инареиҳаны. Убас, агәабзиарахьчаразы ахарџьқәа 2024 шықәсазтәи арбагақәа 246 млн мааҭ рыла еиҳахеит (47,4% рыла).
