«Изныкымкәа ишазгәаҳҭахьоу еиԥш, ари акрызҵазкуа ҭыԥуп, ҳиаша, ҳагәҭакқәа егьырҭ ажәларқәа рызнагаразы, хықәкыла арратә мчы ахамырхәаразы аиқәшаҳаҭра абжьаҵаразы ахархәара аҳҭароуп», - иҳәеит иара.

Уи иажәақәа рыла, ари аиҿцәажәара аетап аԥхьатәи еиԥшымызт, иалагалан алахәылацәа ҿыцқәа, ахәҭакахьала, Еиду Америкатәи аштатқәа рыхьӡала иқәгылоз Еиду амилаҭқәа реиҿкаара ахаҭарнак.

«Ари ачынуаҩ ихадоу аиҿцәажәарақәа ирыцу аспектқәа зегьы дрызҿлымҳан. Иара ирдырын Аԥсны Аҳәынҭқарра ари жәларбжьаратәи аҭыԥ аҿы ицәырнаго ашьақәырӷәӷәарақәеи аргументқәеи» - ҳәа еиҭеиҳәеит Барцыц.

Аминистр инаҵшьны иазгәеиҭеит женеватәи аформат абжьаҟазацәа рыда Аԥсны агәаанагара жәдарбжьаратәи аилазаара ҭбаа рызнагара алзыршо ихадоу мыруганы ишыҟоу.

Олег Барцыц иҳәеит 17 шықәса инареиҳаны ишыҵуа ареалиа ҿыцқәа шьақәгылеижьҭеи.

«Ицәырҵит исуверентәу ихьыԥшым ҩ – ҳәынҭқаррак-Аԥсны Аҳәынҭқарреи Аахыҵ Уаԥстәылатәи Аҳәынҭқарреи, ари афакт жәларбжьаратәи ахәмарыҩцәа зегьы ирыдыркылар акәхоит. Уи азхьамԥшра аконструктивтә лҵшәақәа ахылҿиаауам. Қырҭтәыла ишьақәгылаз аҭагылазаашьа ҳасаб азнаур, ҳара ҳазыхиоуп агәыла ишихәҭоу еиԥш анхара», - иҳәеит Барцыц.

Иара игәаанагарала, Аԥсны Мрагыларатәи Амшын Еиқәа аҿықәи Аахыҵ Кавкази иузаҟәымҭхо иадҳәалоуп.

«Уи арегион аҿы агеостратегиатә роль анагӡара иацнаҵалоит. Урыстәылатәи Афедерациа ацхыраарала, ҳара ҳхатәы ҳәынҭқарра шьақәҳаргылоит, уи амҩа ҳацәхьаҵӡом. Ари апроект аӡәгьы ашәарҭара дҭагылам, аха адәныҟатәи ҳполитика анагӡараҿы ҳаӷәӷәареи ҳхьамҵреи аанарԥшуеит», - ҳәа иԥхьаӡоит иара.

Аминистр далацәажәеит анаҩстәи, 67-тәи араунд азы имҩаԥгатәу аусура ӷәӷәа атәы. Уи иажәақәа рыла, еиҳа-еиҳа жәларбжьаратәи абжьаҟазацәа еилыркаауеит Аԥсны агәаанагара ахшыҩзышьҭра шаҭатәу.

«Ҳара иаҳҭахуп аизыҟазаашьа бзиақәа ҳаманы анхара, ҳапринципқәеи ҳсуверенитети пату рықәызҵо атәылақәа аус рыцуа аҿиара», - иҳәеит иара.