Абри аҩыза алкаа ҟарҵеит атәыла аҳҭнықалақь аҿы имҩаԥысуаз астол гьежь «Аҭҵаарадырратә еилазаара аҿиара: ааԥхьарақәа, акадрқәа, аплатформатә мыругақәа» аҿы.

Иззааҭгылоз азҵаарақәа иреиуоуп, аҵарауааи ачынуааи ишиашоу реимадахара. Аҵарауаа ҿарацәа Рхеилак алахәыла Дмитри Осиа инаҵшьны иазгәеиҭеит аспециалистцәа ҿарацәа русумҭа шаларҵәатәу.

«Ахеилак аусумҭақәа ишиашоу изыдҳәалоу аминистррақәеи аусбарҭақәеи рахь инашьҭлатәуп. Уи иалнаршоит аҭҵаарадырратә еилазаареи Аҳәынҭқарратә усбарҭақәеи рыбжьара аимадара абжьаҵара», - ҳәа азгәеиҭеит Осиа.

Ари аԥшьгамҭа дадгылеит Аҳәынҭқарра Ахада Иусбарҭа анапхгаҩы Беслан Ешба, ишьақәирӷәӷәеит аконструктивтә диалог ишазыхиоу.

Аиԥылара алахәылацәа азааҭгылеит акадрқәа разыҟаҵара азҵаарагьы. Валери Џьынџьал иазгәеиҭеит Урыстәылатәи Афедерациаҿы адиссертациақәа рыхьчараан (еиҳарак амедицина-биологиатә занааҭқәа рҿы) Аԥснытәи аспирантцәа ирызцәырҵуа аԥынгылақәа. Ари ауадаҩра ахылаԥшра аҭара аԥыза-министр Владимир Делбеи аҭҵаарадыррақәа Ракадемиа ахада Зураб Џьапуеи рхахьы иргеит.

Аԥсны аҵарауаа ҿарацәа Рхеилак алахәыла Адгәыр Гәынба аԥсуа бызшәа аҿиара, ацифратә хархәагақәа рахь аиагара уҳәа ирыдҳәалоу азҵаарақәа шьҭихит.

Аҵара аминистр Хана Гәынба ари аԥшьгамҭа дадгылеит, абызшәа аларҵәара аформат арҭбааразы ажәалагала ҟалҵеит.

«Ателехәаԥшра амилаҭтә цәаҩа ӡырызго иактуалтәу аҭҵаарадырратә зҵаарақәа алазырҵәо мыруганы иҟалароуп. Аҿар рхатәы бызшәала рҵареи рыҭҵаарадыррадыра амҩаԥгареи рҿы ицхыраагӡазароуп амедиа», - ҳәа лажәа хлыркәшеит аминистр.