Аиԥылараҿы иқәгылеит: Сергеи Дбар ихьӡ зху Аԥсны Аџьынџьтәылатә еибашьра амузеи анапхгаҩы Гәыгәыца Џьыкырба, агазеҭ «Аԥсны» аредактор хада Ахра Анқәаб, Аԥсуаҭҵааратә институт анапхгаҩы Арда Ашәба, Гәдоуҭа араион ахада Валери Аҩӡба, Аӡынаа аижәлақәа рхаҭарнак Руслан Аӡынба.

Апоетцәа Владимир Занҭариеи Анатоли Лагәлааи Ельчина Аӡынба илзыркыз ражәеинраалақәа ирыԥхьеит.

Иқәгылоз зегьы ҳџьынџьуаҩ иҭабуп ҳәа ларҳәон Аԥсны аинтересқәа жәларбжьаратәи аренаҿы иахьылыхьчоз азы, иазгәарҭеит лгәымшәареи лыԥсадгьыл абзиабареи.

Ельчин Аӡынба еиҭалҳәеит Аԥсны Аџьынџьтәылатә еибашьраан лаб иԥсадгьыл ахьчара дышзымаз. Лара усҟан дхәыҷын, лаб ида дызбоз аӡәгьы дыҟамызт. Илҳәеит лаб ишлаиҳәаз «Сара бара ибхырҟьаны сыԥсадгьыл сзымыхьчаӡеит, аха бара ибылшо зегьы ҟабҵароуп уи ацхырааразы»,- ҳәа.

Лара иазгәалҭеит аринахысгьы адунеизегьтәи ауаажәларра рҟынӡа Аԥсны аҿахәы анагара лыҽшазылшәало.