«Гагра ӡыла аиқәыршәара аобиектқәа иааиуа аԥхынтәи акурорттә аамҭа аҟынӡа еиҭашьақәыргылахароуп», - иҳәеит Аҳәынҭқарра Ахада.

Арҿыцратә усурақәа  цоит 2000-и 4000-и кубометр зкуа аӡымҩангагатә мкьаҭқәа ҩба рҟны.

  Араион иаҭааз Аҳәынҭқарра Ахада аусурақәа шымҩаԥысуазы  адырра ииҭеит Шьаҭанкылатәи аргылара аусбарҭа аиҳабы Демир Гамсаниа. 

 «Ҳазҭагылоу аамҭазы аусурақәа мҩаԥысуеит аӡыржәтә амҽхак аизырҳареи Гагра ақалақь ӡыла аиқәыршәареи рзы аӡыҭыгагатә станциақәеи амкьаҭқәеи шьаҭанкыла реиҭашьақәыргыларазы.

Иахьа уадаҩрас иҟоу ақалақь ӡыла аиқәыршәара злалыршахо аӡыҭгагақәа Репруа аӡиас аҟнытә иҭырго аӡы мацаралоуп.

Иҟоу аӡеизакырҭа иахьа аҭагылазаашьа уашәшәыроуп, иара иҭаӡоит 3000 кубометр.

Арҽеиратә усурақәа рымҩаԥгара анаҩс, аӡеизакыра амч ҩынтә, хынтә раҟара ацҵара ҳалшоит», — Демир Гамсаниа.

Аҳәынҭқарра Ахада сааҭла шьыжьи хәылбыҽхеи ауааԥсыра аӡы рыҭара иадҳәалоу  ас еиԥш аҭагылазаашьа ҟамлароуп.  Ари аҭагылазаашьа аиҳарак иаргәамҵуа аҩнеихагылақәа рҿы инхо ауаа роуп.

«Иҟоу аҭагылазаашьа излауала ирласны ирҽеитәуп хымԥада», – иҳәеит Аҳәынҭқарра Ахада Бадра Гәынба.