Абҵарамза 17 рзы Псковтәи аобласт анапхгараҿы  Урыстәылатәи Афедерациа Псковтәи аобласти Аԥсни рыбжьара аусеицура азҵаарақәа ирызку аиԥылара мҩаԥысит.

     Псков аҳаирбаӷәазаҿы аделегациа дырԥылеит Псковтәи аобласт агубернатор Михаил Ведерников.​

Аԥсны аделегациа аилазаараҿы иҟоуп Аԥыза-министр ихаҭыԥуаа Џьансыхә Нанба, Ҭарашь Ҳагба, аекономика аминистр Ҭеимураз Амқәаб, аҵара аминистр Хана Гәынба, Гәдоуҭа араион ахада Валери Аҩӡба.

Псковтәи аобласт анапхгареи Аԥсны анапхгареи ахәаахәҭра-економикатә, анаука-техникатә, асоциал-культуратә усхкқәа рҿы жәларбжьаратәи, адәныҟаекономикатәи аимадарақәа рыбжьаҵаразы аиқәшаҳаҭра рнапы аҵарҩит. Абри азы адырра ҟанаҵоит Псковтәи аинформациатә маҵзура.    Аусшәҟәқәа рнапы рыҵарҩит Псковтәи аобласт агубернатор Михаил Ведерникови Аԥсны Аԥыза-министр Владимир Делбеи.

Аиԥылара аламҭалаз Михаил Ведерников Аԥснытәи иколлегацәа Псковтәи аобласт аҿы бзиала шәаабеит ҳәа раҳәо, аделегациа инарҭбаау аусуратә мшы рзыԥшуп ҳәа иазгәеиҭеит.

«Ҳара Аԥсны ҳанаҭаа инаркны хымз ҵит, аха  гәахәарыла иазгәасҭоит ҳаиқәшаҳаҭрақәа зегьы анагӡара иаҿуп,  ирацәаны апроектқәа ҳамоуп – еиуеиԥшым аусхкқәа рҿы жәаба инареиҳаны. Аҿартә проектқәа, аекономикеи егьырҭ ахырхарҭақәа рыла жәпаки», -  инаҵшьны иазгәеиҭеит агубернатор.

Михаил Ведерников игәалаиршәеит, жьҭаарамзазы Аԥсны ишаҭааз Псковтәи аусдккылаҩцәа. Урҭ хықәкы хадас ирыман ареспублика аимпорти аекспорти рпотенциал ахәшьара аҭара. Иара убас, Псковтәи аобласт аҟынтәи 15-ҩык ашколхәыҷқәа апрограмма «Аԥсныҟа аеконыҟәара» аҳәаақәа ирҭагӡаны ареспублика иаҭаахьеит.  

«Ииааиуа ашықәс азы  аҿартә дипломатиа ашкол аҳәаақәа ирҭагӡаны инагӡахо апроектқәа аабаратәы алшара ҳауеит. Уи раԥхьатәи жәа-проектк роуп, ари, ҳәарада иацҵахоит.  Агәра ганы сыҟоуп, иахьатәи ҳаиқәшәара иалҵшәаны ҳаԥхьаҟа иҳабжьаҳҵараны иҟоу аиқәшаҳаҭраҿы ас еиԥш иҟоу апроектқәа еиҳа ишырацәахо», – иажәа хыркәшо,  иҳәеит Михаил Ведерников.

«Аԥсны Аҳәынҭқарра аҽазнашәоит Урыстәылатәи Афедерациа асубиектқәа зегьы рҟны инарҭбааны аусеицура, ахәҭакахьала, Псковтәи аобласт налаҵаны. Август азы шәара ҳашҟа шәнеира иҳәаақәнаҵеит аусеицура ахырхарҭа хадақәа. Ҿырԥштәыс иаагозар, Псковтәи анападкылаҩцәеи ҳбизнесуааи ирылшеит аицәажәара, наҟ-ааҟ ринтересқәа разгәаҭара, аинвестициақәа радыԥхьалара. Иаҳҭахуп абас еиԥш иҟоу аԥшьгамҭақәа иҵегьы ирацәахарц. Агәра ганы сыҟоуп, Псковтәи аобласти ҳареи ҳусеицура аԥхьаҟагьы алҵшәақәа шаиуа», – иҳәеит Аԥыза-министр Владимир Делба.

Иара убас рнапы аҵарҩит Урыстәылатәи Афедерациа Псковтәи аобласти  Аԥсны Гәдоуҭа араиони рыбжьара аиҩызаратә еизыҟазаашьақәа раԥҵаразы аиқәшаҳаҭра.

«Аԥхынтәи аԥсшьарамшқәа раан Псковтәи ашколхәыҷқәа Аԥсныҟа иаауеит, – лҳәеит атәыла аҵара министр Хана Гәынба Псковтәи аобласти Аԥсни русеицура иазкыз аилацәажәараҿы, – иаанацҳауеит аинформациа Псковтәи амаҵзура.

Лара инаҵшьны иазгәалҭеит Псковтәи, Аԥснытәи ашколхәыҷқәа аиҩызара шрыбжьалаз. «Актәи амодуль аекологиа иазкызҭгьы, ҳаԥхьаҟа ирыдаагалоит Аԥсны аҵакыраҿы аҭоурыхтә модуль. Ираҳҳәаша ҳамоуп», – иазгәалҭеит Хана Гәынба. Лажәақәа рыла, Аԥснытәи ашколхәыҷқәа ианвартәи аԥсшьарамышқәа раан Псковҟа ацаразы амаҭәа ԥхақәа раахәара иаҿуп. «Аԥхын аҭоурыхтә лагер инамаданы Псковаа ҳарзыԥшуп», – лҳәеит аҵыхәтәан.

Псковтәи агубернатор актәи ихаҭыԥуаҩ Вера Емелианова аилацәажәараҿы дазааҭгылеит аҵара аганахьала русеицура атәы. Илгәалалыршәеит ашколхәыҷқәа раԥхьатәи ргәыԥ Аԥсныҟа ишнеихьоу, егьырҭ ахәыҷқәагьы урҭ рныҟәара аӡбахә шраҳахьоу, ргәы хыҭ-хыҭуа иазыԥшуп шәышҟа анеира. Агубернатор ихаҭыԥуаҩ иаҵылшьит агегионқәа рыҩбагьы реизыҟазаашьақәа шьаҭас ишрымоу акультура-ҭоурыхтә традициақәа, арра-патриоттә ҵакы.