Ари аҽны Цхьынвал ақалақь аҿы Аԥсадгьыл ахьчаҩцәа Рмемориали Цхьынвалтәи абжьаратәи ашкол №5 ашҭаҿы иҟоу Амемориалтә ԥсыжырҭаҿы игылоу ауахәамеи рымҵан ашәҭшьыҵәрақәа шьҭеиҵеит.
Анаҩс имҩа хан Аахыҵ Уаԥстәыла Ахада Иусбарҭа ахь. Аԥсны Ахада иаара аҳаҭыр азы араҟа аҳаҭыртә ҟарул ықәыргылан. Аахыҵ Уаԥстәыла Ахада Алан Гаглоеви иареи реиԥылараҿы, аҳәынҭқаррақәа рхадацәа акыршықәсатәи аусеицура азҵаарақәа ирылацәажәеит, иара убас, агәаларшәагатә ҳамҭақәа еимырдеит.
Адырҩаҽны Бадра Зураб-иԥа зхадараҿы дыҟоу Аԥсны аделегациа, Ареспублика Аахыҵ Уаԥстәыла 35-шықәса ахыҵра иазкны имҩаԥгаз апарад иаҭааит. Аԥсны Ахада уаҟа ауаԥс жәлар дрыдныҳәало иқәгылараҿы иазгәеиҭеит:
«Ҳаҭыр зқәу Алан Едуард-иԥа, Аахыҵ Уаԥстәылаа ҳашьцәа, акыр иаԥсоу аҩызцәа! Сара сзы ҳаҭыр дууп иахьа ара аҟазаара, Ареспублика 35 шықәса ахыҵра иазку аныҳәа ду ахьшәыцеиҩысшо. Ари ахҭыс аҭоурыхтә ҵакы амоуп, акыр шықәсқәа раахыс ахақәиҭреи исуверентәу аҳәынҭқарреи рзы ақәԥара мҩаԥызгоз Аахыҵ Уаԥстәыла ажәлар ргәымшәареи рхачҳареи ирсимволуп. Ахьыԥшымрахь инагоу амҩа ахаангьы имариаӡам. Аахыҵ Уаԥстәыла ажәлар аԥышәареи ацәыӡ дуқәеи акыр рхыргеит, аха абри ақәԥароуп Аахыҵ Уаԥстәылатәи аҳәынҭқарра ахьыԥшымра уасхырс иазышьҭалазгьы. Ҳара ҳажәларқәа рҭоурых ахьеиԥшу рацәоуп, ахақәиҭразы ақәԥараантәи ашықәс хьанҭақәа еицаҳхаҳгеит. Лахьынҵак ауп иҳамоу, ахақәиҭра аҵакы еиԥшны иҳадаҳкылоит. Иаҳдыруеит уи иахҭнаҳҵаз, убри аҟнытә ахәгьы ҳаракны иаҳшьоит. 17 шықәса раԥхьа, 2008 шықәса нанҳәамза 8 рзы Аахыҵ Уаԥстәыла ажәлар еиҭа аԥышәара ӷәӷәа иҭагылеит. Абри ауха ақырҭуа архәҭақәа мыцҳәарыла Аахыҵ Уаԥстәыла иақәлеит, ҭынч ицәаз ақалақь ахи аҵыхәеи иалаланы, урыстәылатәи абжьаҟазацәа рбаза еихсуа. Ишьаарҵәыраз урҭ амшқәа рзы адунеи даҽазныкгьы лабҿаба иабеит ауаԥс жәлар ахақәиҭреи ахьыԥшымреи рзы хьаҵрак шыҟарымҵо. Аахыҵ Уаԥстәыла иадгыланы иқәгылаз Урыстәылатәи Афедерациа аганахьала иаиуыз ацхыраара иабзоураны, ари аибашьраҟны усҟан аҭагылазаашьа шьаҭанкыла аҽаԥсахит. Убасҟан аҭоурых аҟны Аԥсни Аахыҵ Уаԥстәылеи рхьыԥшымра азхаҵара адаҟьа ҿыц аартын. Арҭ ахҭысқәа ҳгәалашәараҿы инхоит аиашьареи, агәымшәареи, аиашареи ирсимволны.
Аахыҵ Уаԥстәыла иахьа аҿиарамҩа иануп. Арҭ ашықәсқәа рыҩныҵҟала аусура ду мҩаԥгоуп амчхара аинститутқәа, аҵараиура, агәабзиарахьчара асистема рырӷәӷәаразы. Ареспублика шьаҿа-шьаҿала жәларбжьаратәи аизыҟазаашьақәа рзин наӡа змоу субиектк аҳасабала ахы ашьақәырӷәӷәара иаҿуп, активла аинтеграциатә процессқәа ирылахәуп, аекономикатә еизыҟазаашьақәа, адәныҟаполитикатә еимадарақәа рырҿиара мҩаԥысуеит.
Арҭ амшқәа рзы Цхьынвал имҩаԥысуеит жәларбжьаратәи аекономкатә форум «Аахыҵ Уаԥстәыла». Аинвестициақәа рылаԥшҳәаа». Уи, жәаҳәарада, аекономикатә еизыҟазаашьақәа рырҭбаара иацхраауеит, аекономикатә ҿиаразы алшара ҿыцқәа аанартуеит.
Акыр иаԥсоу аҩызцәа!
Аԥсни Аахыҵ Уаԥстәылеи традициала аишьаратә ҟазшьа ныҟәыргоит. Шәареи ҳареи ҳаидгыланы ахьыԥшымра амҩа ҳанысит, убас ҳаидгылоуп исуверентәу ҳҳәынҭқаррақәа рыргылареи рырҿиареи рыҟны. Аҵыхәтәан, Аахыҵ Уаԥстәыла ажәлар гәык-ԥсык ала ирыдысныҳәаларц сҭахуп Ареспублика 35 шықәса ахыҵра, аҭынчра, аихьӡара ҿыцқәа аҳәынҭқарра ԥхьаҟа аизырҳара амҩаҟны.

Нагӡара ақәзааит Аахыҵ Уаԥ­стәыла Ареспублика!»
Анаҩс, Аԥсны Ахада Бадра Гәынбеи Аахыҵ Уаԥҵстәыла Ахада Алан Гаглоеви, Урыстәыла Ахада Иусбарҭа анапхгаҩы актәи ихаҭыԥуаҩ Сергеи Кириенкои, егьырҭ ҳаҭыр зқәу асасцәеи еицны аетнографиатә ныҳәа «Ауаԥсаа ргәараҭа» иаҭааит. Традициала ишышьақәгылахьоу еиԥш, асасцәа ауаԥсаа рчеиџьыкеи ашәаҳәареи акәашареи рыла ирԥылеит. Аныҳәа аҿы асасцәа ирыдыргалон еиуеиԥшым амилаҭтә чысхкқәа, иара убас Аахыҵ Уаԥстәыла араионқәа зегьы рҟынтәи ажәлар рнапҟазацәа русумҭақәа рцәыргақәҵа еиҿкаан. Цхьынвал ақалақь апавилион аҭаараан Бадра Гәынба ҳаҭыр зқәу асасцәа ирыдыргалаз ауаԥс чашә иагәылаз аԥараҿырпы иқәшәеит. Традициала уи аманшәалареи аизҳазыӷьареи иазкуп.
Аԥсны Ахада аныҳәа ауаԥс жәлар рмилаҭтә ҷыдаҟазшьара, рҟазара, рысасдкылара шьахә, рдац-ԥ­ашә ахь ирымоу аҳаҭырқәҵара зеиӷьаҟам ала иаанарԥшит ҳәа инаҵшьны иазгәеиҭеит.
Ареспублика Аахыҵ Уаԥстәыла Ахада Алан Гаглоев Иусԥҟа инақәыршәаны, Аԥсны Аҳәынҭқарра Ахада Бадра Гәынба – Аԥсни Аахыҵ Уаԥстәылеи русеицуреи реимабзиаратә еизыҟазаашьақәеи рырҿиара аус аҿы хаҭала илагала азы атәыла иреиҳау аҳамҭа – Аиҩызара Аорден ианашьахеит. «Сара сзы ҳаҭыр дууп ари аҳамҭа ҳарак аиура, уи Аԥсни Аахыҵ Уаԥстәылеи ирыбжьоу аиҩызыреи аиашьаратә еизыҟазаашьқәеи ахаангьы имбго рышьаҭа символра азнауеит»,– ҳәа азгәеиҭеит Аԥсны Ахада Бадра Гәынба.