Ҵабыргны, уи хьаа дууп, харҭәаашьа змам ацәыӡ зауз аҭынхацәеи ақәлацәеи рзы. Урҭ ргәеиқәҳәалагатә дгыларак аҳасабала, зҵакы маҷым шьаҿоуп, ибжьаӡыз ргәалашәара ахьӡала еиуеиԥшым аусмҩаԥгатәқәа рымҩаԥгалара.
Убас, есышықәсеиԥш сынтәагьы ари амш азгәаҭара хацыркын Ахьӡ-аԥша абаҳчаҟны ашәҭ шьыҵәрақәа рышьҭаҵарала. Уахь инеит атәыла Ахада ихаҭыԥуаҩ Беслан Бигәаа, Аԥыза-минитр Владимир Делба, атәыла Ахада Иусбарҭа анапхгаҩы Беслан Ешба, ауаажәларратә еиҿкаара «Аҭынчреи асоциалтә иашареи рзы анацәа Рхеилак» ахантәаҩы, Аԥсны ауаажәларратә палата амаӡаныҟәгаҩ Гәыли Кьычба, адепутатцәа, атәылахьчара аминистрра ахаҭарнакцәа, аибашьра аветеранцәа, иахьа уажәраанӡа зыхабарк ыҟам рҭынхацәа, ауаажәларра.
Анаҩс, С.Ҷанба ихьӡ зху аԥсуа ҳәынҭқарратә драматә театр ахыбраҿы иацҵан аусмҩаԥгатә. Уаҟа иаартын 1992-1993 ш.ш. рзтәи Аԥсны жәлар рџьынџьхеиқәырхаратә еибашьра аан хабарда ибжьаӡыз 171-ҩык рфотосахьақәа рцәыргақәҵа, урҭ зегь рымҵан иаркын ацәашьқәа. Аҵыхәтәантәи ажәашықәса иалагӡаны ҳтәыла аиҳабыреи жәларбжьаратәи ауаажәларратә еиҿкаарақәеи русеицура иабзоураны, 47-ҩык рхаҭарақәа шьақәыргыланы, рыԥсыбаҩқәа анышә иамадоуп хьыӡла.
Акырӡа зҵазкуа ари аԥшааратә усура анаҩсгьы ишгәыгәҭамыжьхо, атәыла анапхгара уи азы ирылшо зегьы шыҟарҵо атәы дазааҭгылеит, «Акыр иаԥсоу анацәа, аҭаацәа. Агәра згоит гәыҩбарада, зегьы ҳаилибакаареи ҳамчеибыҭареи ирыбзоураны, ахаҭара ашьақәыргылара иазынархоу аԥшааратә усурақәа хараӡа имгакәа рынагӡара шҳалшо. Ҳазшаз ачҳара ҵаула ҳаҭәеишьааит. Хабарда ибжьаӡу наунагӡа хашҭра рықәымзааит» ҳәа зажәа хзыркәшаз, аԥыза-аминистр ихаҭыԥуаҩ, аҿари аспорти русқәа рзы Аҳәынҭеилакы ахантәаҩы инапынҵақәа назыгӡо Ҭарашь Ҳагба.
Аԥсны жәлар рартистка, еицырдыруа ашәаҳәаҩ Лиумила Гәымба иналыгӡеит ауаҩы игәаҵанӡа инеиуа, игәырԥшаагоу, аха убриаангьы игәырӷәӷәагахартә ирхәыцгоу акымкәа ашәақәа. Ҳаԥсуа поетцәа ҟазацәа рҩымҭақәа ҿырҳәала исахьаркны ирыԥхьеит абжьаратә школқәа рҵаҩцәеи, еиҳау аҵараиурҭақәа рстудентцәеи. Агәалашәаратә хәылԥазы хыркәшан, ажурналист Гәыгәыца Ҩардан авторс дызмоу адокументалтә фильм «Без вести. Без права на прощание…» ахәаԥшрала.