Уи хықәкыс иамоуп атәылауаа рыгәҭакқәа рынагӡаразы аҭагылазаашьақәа раԥҵара, атәыла ашәҭыкакаҷра ацхраара, ауаҩы имч-илша арӷәӷәара. Аиҿкаара рыдгылоит аконкурсқәа рымҩаԥгара, «Аԥсны акоманда» афиналистцәеи аиааира згази аус здырулаз апроектқәа рынагӡара.

Ахада Иусбарҭа анапхгаҩы Беслан Ешба аконкурс алахәылацәа дырԥылеит, иаҵишьит «Аԥсны акоманда» ихадароу аҭыԥ шааннакыло Аԥсны иҭышәынтәаланы аҿиаразы аԥшьгамҭақәеи алшарамчқәеи еидызкылауа аиҭакра бзиақәа амҩа рзаартраҿы. Аиҿкаара злабзиоу убри ауп, уи иалшоит аиҭакрақәеи ауаажәлар рҭахрақәеи ирласны рхаҵгылара.

Зхала иҟоу икоммерциатәым аиҿкаара «Аԥсны акоманда» Анаԥшратә хеилак ахантәаҩыс дҟаҵоуп Ахада Бадра Гәынба, директор хадас – Георги Габуниа.