Аԥсны аҿиара Алабораториа аилатәара мҩаԥысит, уи иалахәын Аԥснытәи аспециалистцәеи Урыстәылатәи аексперттә гәыԥи.
Аилатәара алахәылацәа аусурақәа рылагара, аҭҵаара ахырхарҭа хадақәа, ареспублика аусбарҭақәеи араионқәеи аус рыцура иалацәажәеит.
Имҩаԥысраны иҟоу аусура иазԥхьагәанаҭоит Аԥсны атуристтә, акультуратә, акреативтә лшарақәа анализ рзура, аҵакырақәа ринфраструктуреи ртранспорттә знеишьеи ахәшьара аҭара. Алҵшәақәа атуристтә мастер-плани амҩақәҵагеи разырхиаразы шьаҭаны иҟалоит.
Аԥсуа ган ӡырыргеит акультура аминистр Даур Ақаҩба, атуризм аминистр Асҭамыр Логәуа, Аԥсны аҭҵаарадыррақәа ракадемиа ахада Зураб Џьопуа, Аԥсуаҭҵааратә институт адиректор Арда Ашәба, Аԥсны аҭҵаарадыррақәа ракадемиа аекологиа Аинститут адиректор Роман Дбар, ақыҭанхамҩатә ҭҵаарадыррақәа ркандидат, ААУ арҵаҩы Лорена Џьынџьал, ААУ амилаҭтә економика акафедра адоцент Линда Амԥар, аҳәынҭқарра ахада Иусбарҭа агуманитартә политика аусбарҭа аиҳабы Викториа Бебиа.
Урыстәылатәи агәыԥ иалоуп атуризм агеографиеи, архитектуреи, амастер-планҟаҵареи, акреативтә економикеи рзы аҟазауаа ргәыԥ, напхгара риҭоит Александр Панин.
