Аԥсны ахыркәшарахь инеиуеит ақыҭақәа ртәылауаҩшәҟәқәа аус рыдуларазы апроект. Абри атәы аҳәынҭқарра ахада имҩаԥигаз аилацәажәараҿы иҳәеит Аҳәынҭқарра ахада Иусбарҭа анапхгаҩы Беслан Ешба.
Ақыҭақәа ртәылауаҩшәҟәқәа иаку информациатә базаны иҟалоит, уаҟа инҭырҳәцааны иаарԥшхоит адемографиатә ҭагылазаашьа, аекономика уажәтәи аҭагылазаашьа, ақыҭанхамҩа аԥеиԥш.
Уажәазы аусура аиҳарак нагӡоуп. Апрофильтә усбарҭақәа рҟазауааи араионқәеи ақыҭа администрациақәа рнапхгареи аҭыԥқәа рҿы еизгоу адыррақәа ргәаҭара иалагеит.
Ишьақәырӷәӷәоу аграфик инақәыршәаны анапынҵа анагӡара аофициалтә ҿҳәара нҵәоит ԥхынҷкәынмза 1 азы, аха аусутә гәыԥқәа ақәгәыӷуеит аграфик иаԥыганы аинформациа аизгареи аус адулареи инагӡаны ихдыркәшап ҳәа — абҵарамзазы.
