«Ҳаҭыр зқәу Аԥсны жәлар!
Гәык-ԥсык ала ишәыдысныҳәалоит аԥсуа бызшәа Амш!
Жьҭаара 27 - иҷыдоу рыцхәуп. Хымԥада иҟазароуп асимволтә ҵакы змоу, ҳхатәы бызшәа аҵакы ҷыдала ианаҵаҳшьуа, уи аиқәырхареи, арҿиареи рзы имҩаԥаҳго аусқәа лымкаала ҳанрызхьаԥшуа. Аха сара агәра ганы сыҟоуп ҳҳәынҭқарраҿы есыҽны аԥсуа бызшәа иамшны иҟазароуп ҳәа. Уи аиҷаҳара рыцхәк, мамзаргьы хаз игоу усмҩаԥгатәқәак азҳархар ҟалом. Ари аус есымшатәи ҳуалԥшьоуп, ҳзеиԥш ҭакԥхықәроуп.
Аԥсуа бызшәа ҳмилаҭтә хаҿра асимвол хадақәа ируакуп, ҳажәлар рҭоурыхтә ҭынха иузаҟәымҭхо иадҳәалоуп. Уи ианыԥшуеит ҳҭоурых, ҳқьабзқәа, ҳдунеихәаԥшышьа, ҳдоуҳатә беиарақәа. Ҳбызшәа аиқәырхара-аԥсуа ҳәынҭқарра аиқәырхара ауп иаанаго.
Аԥсны Аҳәынҭқарра Аконституциа инақәыршәаны аԥсуа бызшәа ҳәынҭқарратә бызшәоуп. Ари ақьаад аҿы мацара ишьақәырӷәӷәоу конституциатә нормаӡам. Ари аҳәынҭқарреи ауаажәларреи есыҽнытәи рыԥсҭазаараҿы иаарԥшлатәу принципуп.
Абызшәа аҳәынҭқарратә статус излазгәанаҭо ала, уи аҳәынҭқарратә усбарҭақәа русураҿы инагӡаны ахархәара аҭатәуп. Зегь раԥхьа инаргыланы анагӡаратәи, азакуанԥҵаратәи, аӡбарҭатәи усбарҭақәа рҿы.
Убри аганахьала ҳусура амҽхак ҳарҭбаароуп. Ҳара иаҳуалуп аԥсуа бызшәа аҳәынҭқарра иасимволны мацара акәымкәа, есымшатәи ҳаԥсҭазаараҿы инарҭбааны ахархәара змоу бызшәаны аҟаҵара.
Ҳәарас иаҭахузеи, ари аус залыршахом ауаҩы дшыхәыҷу ихатәы бызшәа агәыблра иаҳмыркыкәан. Уи системала иазнеитәуп. Зегь раԥхьа иргыланы уи зуалу аҭаацәа роуп. Аха урҭ иреиҵамкәан аҭакԥхықәра рыдуп ахәыҷ баҳҷақәа, ашколқәа, абжьаратәии иреиҳаӡоу аҵараиурҭақәа.
Иаԥаҳҵароуп убас еиԥш аҭагылазаашьа-аҿар рхатәы бызшәа адырра мацара акәымкәан, уи ала ицәажәо, ихәыцуа, рыԥсҭазаараҿы рхы иадырхәо. Убри аан, ҳара еилаҳкаауазароуп абызшәа ҳаамҭазтәи аҭагылазаашьақәа рҿы аиқәырхара азнеишьа ҿыцқәеи ҳаамҭазтәи атехнологиақәеи шаҭаху.
Аԥсуа бызшәа рылазароуп ҳаамҭазтәи ацифратә плотформақәа, аиҭагаратә системақәа, егьырҭ ҳаамҭазтәи амыругақәа.
Ари ахырхарҭала иҟаҵоу маҷӡам. Аԥсуа бызшәа цәгьамкәан иалагалоуп Яндекс аиҭагаратә платформа, аус рыдырулоит егьырҭ апроектқәа. Ари аус иацҵатәуп, ирҭбаатәуп аҵарауаа, аинформациатә технологиақәа рыспециалистцәа, арҵаҩцәа, аҳәынҭқарратә усбарҭақәа уҳәа рымчқәа еилаҵаны. Аԥсны анапхгара ари аус адгылара арҭоит.
Аха аҵареи, аҳәынҭқарратә цхыраареи, атехнологиақәеи инарываргыланы иҟоуп акрызҵазкуа даҽа зҵаарак — ахатәы бызшәа аҳаҭыр ашьҭыхра. Ҳәара аҭахыума еиуеиԥшым аусхкқәа рҿы абызшәа адырра мацара азхом, аха ззанаҭ иазҟазоу, аҳәынҭқарратә бызшәа бзиан издыруа, зус аҿы зхы иазырхәо аспециалистцәа радыԥхьалара иазҿлымҳазароуп аусбарҭақәеи анаплакқәеи рнапхгаҩцәа. Аԥсуа ихатәы бызшәа анидыруа иџьаҳшьо ак акәымкәан ҳаԥсҭазаара иузаҟәымҭхо иадҳәалоу норманы аҟаҵара хықәкыс иҳамазароуп.
Ари аус ду аҿы иҷыдоу ароль рымоуп ҳҵарауаа, ҳфилологцәа, ҳашәҟәыҩҩцәа, ҳарҵаҩцәа, абызшәа арҿиара знапы алаку зегьы. Иахьа иҳамоу аҭҵаарадырратә ҭынха аиқәырхара адагьы, ихадоуп иманшәалоу арҵара аметодика ҿыцқәа раԥҵара.
Ҳбызшәа аиқәырхара, арҿиара - ари ҳажәлар зегь ирзеиԥшу, еидызкылоу зҵаароуп. Уи ҳҳәынҭқарратә идеологиа шьаҭас иамазароуп.
Даҽазныкгьы ишәыдысныҳәалоит аԥсуа бызшәа Амш!
Наунагӡа аԥсуа ҳәынҭқарра иқәҩлааит аԥсуа бызшәа».
