Апроект нагӡоуп Урыстәыла акультура аминистрра, акультуратә аԥшьгарақәа рзы Ахада ифонд, Аԥсны Аиҳабыра, ареспублика акультура аминистрра рыцхыраарала.
Акыршықәсатәи атрадициа инақәыршәаны аконцертқәа мҩаԥысуеит азалқәа рҿы адагьы адәаҿы. Уажәазы сценаны иҟалеит X ашәышықәсазы иргылаз Бедиатәи аныхабаа ашҭа. Уаҟа еизеит шәҩыла Аԥсны ауааԥсыреи асасцәеи.
Ари ахәылԥаз азы Хьыбла Гьерзмаа дрыцықәгылеит академ-квартет, уи иалахәын Леонид Полиаков, Зухра Полиакова, Григори Чекмарев, Максим Акчурин. Аконцерт иара убасгьы иалахәын ауарӷанарҳәаҩы Лука Гаделиа, аккордеонист Никита Власов, аконтробасист Васили Андреев, Александр Островски (кахон). Ахәылԥаз мҩаԥигон Алексеи Барабанов.
«Бедиа имҩаԥаҳго аконцерт сара сзы афестиваль зегь реиҳа сгәы хыҭхыҭуа сыззыԥшу ируакуп. Ашьхақәа рыбжьара, ажәытә уахәама аҭӡамцқәа рҿы амузыка абжьы анго зынӡа иҷыдоу ацәанырра узцәырҵуеит. Ари концерт ныҳәоуп ҳара ҳзы», — лҳәеит Гьерзмаа.
XXIV амузыкатә фестиваль «Хьыбла Гьерзмаа шәаалыԥхьоит...» аԥсуа хәҭа хыркәшахоит нанҳәамза 8 рзы Пицундатәи ауахәамаҿы имҩаԥысуа аконцерт ала.
